WILLEMSTAD.- E kaso di desaparishon di Amy Bradley a bolbe lanta kabes. Tin un rekompensa di 25 mil dòler pa informashon ku por kondusí pa resolvé e misterio aki. A mira e dama di 23 aña pa último biaha na 1998 durante un cruise den Caribe. Bradley tabata ku fakansi huntu ku su mayornan i ruman hòmber riba un barku di Royal Caribbean International, Rhapsody of the Seas na momentu ku el a disparsé. E barku tabata mará den haf di Kòrsou.

E agente speshal riba e kaso aki Erin Sheridan a bisa ku e barku a sali for di Aruba i despues bishitá Kòrsou (e tempu ei Antia Ulandes). E anochi ei Amy a sali bai un disco ku su ruman i otro pasaheronan i miembro di e tripulashon. Nan a pasa hopi bon pero mainta ora ku e mayornan i e ruman hòmber a lanta, no por a haña Amy ningun kaminda. E ruman di Amy, Brad tabata e último hende ku a mir'é. "Ami i mi mayornan mester a soportá masha tristesa. E último kos ku mi a bisa Amy e anochi ei promé ku mi a bai drumi ta "mi stima bo". Esei semper a duna mi aliento ku mi por a bis'é esei na final di e anochi", asina Brad Bradley a bisa.

Investigadornan ta bisa ku falta hopi detaye di e anochi ku Amy a pèrdè di manera ku kualke detaye por yuda agentenan solushoná  e kaso. Nan a indiká ku nan lo sigui buska mas informashon riba e kaso aki i wak si por solushon'é. FBI ta pidi tur hende ku por duna mas informashon riba e kaso pa hasi esei, sea serka kualke embahada merikano òf ‘online’ na tips.fbi.gov

Tempu ku e kaso a tuma lugá tabatin yen di informashon ta sirkulá, entre otro ku Amy a bira "víktima" di un hòmber lokal. E tempu ei a menshoná nòmber di e hòmber aki ku miéntras tantu a bai sosegá. Testigunan a bisa ku nan a mira nan den e área di un hotèl den Penstraat pero nunka a verifiká e informashon aki independientemente.

E kaso di Amy Bradley ta un poko komparabel ku esun di Natalee Holloway ku te awe no a klarifiká. E diferensia ta ku Holloway tabata keda den un hotèl na tera na Aruba na momentu ku el a disparsé. E kaso Holloway a haña hopi publisidat i daña imágen di Aruba komo ku el a tuma lugá den un periodo kaminda retnan soshal a kuminsá bira mas agresivo. E kaso Bradley tabata hopi mas promé ku e retnan aki tabata aktivo. Prensa merikano no a tene na e kaso Bradley manera a tene na e kaso Holloway.