WILLEMSTAD.-   Awe  korte di promé instansia ta bai trata ekspropiashon di  e propietarionan di La Tasca, Micheal i Nina Koense. Ta trata di e kaso Venus di kual ámbos akusado a keda kondena pa trafikashon humano.

Den e veredikto, fiskal no a bai di akuerdo ku hues a apsolvé e akusadonan pa e akusashon di “seksuele uitbuiting”.

Pues ku e damanan tabata keda obligá pa tene relashon seksual/ prostituí ku klientenan pa por generá plaka i paga debe serka e akusadonan prinsipal.

E kondena ku e  akusadonan a risibí kompará ku loke Ministerio Públiko a demanda, tampoko no a kai na agrado di Ministerio Públiko.

Segun e akusashon, Micheal i Nina  tabata kometé trafikashon di hende, mal uzo di poseshon kontra e víktimanan, prohibí nan di tin kontakto, laga nan kompartí un kamber chikí ku otro será na yabi, laga nan traha for di 10 ‘or di anochi te ku 11 ‘or di mainta sin pouze, sin kuminda 6 dia pa siman i tabata obligá nan sedusí e hòmbernan i tene relashon seksual ku nan kontra pago pa paga nan debe nan.

Tambe nan tabata keda obligá pa para riba sapatu haltu mas di 8 ora.

E damanan tabata haña but di 250 florin si nan sali for di e bar bai ku otro hende. Òf si un kliente kier a bai ku un dama, e tabatin ku paga 200 florin.

Esaki ta e motibu ku OM a kuminsá un kaso di ekspropiashon kontra di e pareha na e suma di 600 mil florin. Segun Ministerio Públiko, nan a hasi un kalkulo ku e pareha lo a gana riba kada dama den e negoshi ku nan ta keda akusá di dje di “Trago meisjes”.

Durante tratamentu di e kaso anteriormente, fiskal a splika ku e damanan tabata wòrdu paga un salario di 125 pa 175 florin pa siman ku ta 2,50 pa ora ku ta kompletamente bou di pago pa lei.

Segun e kalkulo, e  akusadonan tabata gana mas o ménos 333 mil florin riba e damanan kitando tur gastu.

Ámbos akusado a ninga e akusashonnan i a bisa ku ta duru nan a traha pa tin loke nan tin i ku niun momento so nan no a abuzá di niun di e damanan. Tambe nan a duna di konosé ku nan no tin nada pa ekspropiá.

E kaso lo keda trata awe den oranan di atardi.