WILLEMSTAD.- Awe Ministerio Públiko ta bai inisiá un kaso di ekspropiashon kontra di N.Trinidat ku a keda kondená pa trafikashon di hende, ku a haña e nòmber “Tres Belle”.
Ta trata di e kaso di kual a akusá propietario di “Hot Chicks” / Wings Cafe i su ko akusadonan di tabata buska damanan for di Venezuela den e periodo di 15 mart 2017 te ku 8 di yüni 2019, pa via di Colombia nan bini Kòrsou ilegal traha komo “trago meisjes” i prostituí kontra nan boluntat.
Despues di un investigashon Divishon di Krímen Organisá di Kuerpo Polisial Kòrsou den koperashon ku Warda Kosta, Duana, KMar (Koninklijke Marechaussee) i R.S.T. a tene entradanan hudisial na 3 diferente lokalidat i a detené 4 sospechoso inkluso T. Trinidat.
Segun e akusashon di Ministerio Públiko e akusado tabata trese e damanan fo’i Venezuela dor di ofresé nan trabou den “Hot Chicks” sin kontrato.
Na momento ku e damanan yega Kòrsou nan tabata keda obligá pa traha komo “trago meisjes” i tene relashon seksual ku kliente pa paga nan debe. Trinidat a sinta su kastigu i ya ta den libertat.
Ministerio Públiko ta haña ku Trinidat tabata gosa di e ganashi di e tragonan karu ku damanan tabata bende, popularidat bou di e negoshi mirando e kantidat di e klientenan ku tabata bishitá e lugá, tabata spar kostonan pa paga weter i ku e no mester a paga impuesto òf pèrmit di trabou ni tampoko no mester a sera un konvenio di trabou ku e trahadónan
No mester a paga suèldu mínimo ni prima di malesa, òf otro primanan sosial.
Mirando tur esakinan Ministerio Públiko ta bai hasi petishon na korte di promé instansia pa ekspropiá un kantidat supstansial di plaka for di e akusado awe.