WILLEMSTAD.- Ayera a keda publiká na Ulanda ku ING Bank na Amsterdam, a yega na un akuerdo di pago di un but di 775 mion euro. E suma mionario aki ta pasobra e banko no tabata sufisiente alerta na negoshinan i personanan ku a laba miónes di plaka via di nan. Ku e areglo di pago aki, ING a evitá pa bai korte.
Ministerio públiko ta akusá ING na Ulanda, ku pa añanan largu a faya ku atendementu struktural dje lei pa evitá labamentu di plaka i finansiamentu di terorismo. Sinembargo esaki tabata sosodé di tal manera ku por akusá e banko di labamentu di plaka tambe.
E banko no a evitá ku kuentanan bankario di klientenan di ING na Ulanda, entre e periodo di 2010 pa 2016, a ser usá pa laba miónes di euro.
E loke ku a hala atenshon ta di kuater kaso di sea hende of kompania ku a laba miónes via di ING Bank. I den esaki ta aparesé e negoshi di lingerie di famia Grijnstein na Kòrsou. E kaso aki ainda ta den korte di promé instansia na Ulanda pa keda trata i ta karga e nòmber “Cymbal”. E akusado mayó den e kaso aki ta Iscaac Grynstein.
Segun investigashon penal a demostrá ku en realidat ING a faya di konstatá aktonan di labamentu di plaka. E klientenan por a usa nan kuenta bankario pa laba plaka manera e negoshi di lingerie ku ta na Kòrsou. Segun ministerio públiko e negoshi di lingerie a laba alrededor di 150.000.000 euro via di su kuenta na ING na Ulanda. Pa e banko mester tabata bon kla ku e fluho di plaka ku tabata ser manehá riba e kuenta, no tabatin nada di aber ku lingerie, i tabatin sierto kos inusual tabata tumando lugá. Nan a laba plaka kriminal. Atrobe e banko no a hasi sufisiente investigashon di kliente.
E negoshi di lingerie riba papel tabata situá na un adrès na Amsterdam-Oost. E negoshi tin kuentanan na ING Ulanda ku tin bastante dje mashinnan di lanta sèn. Pero en realidat no tabatin ningun negoshi na e adrès na Amsterdam, i e mashinnan di lanta plaka tabata na Kòrsou.
Entre 2010 pa 2014 e kompania di lingerie lo a bende 150 mion euro. E klientenan, pa gran parti tabata venezolanonan ku tabata haña dòler kèsh despues di a paga ku nan tarheta di krédito na lugá di lingerie. Di e forma aki e venezolanonan tabata desviá e limitashonnan ku gobièrnu di Venezuela a pone, pa hasi kambio di bolivar pa dòler. ING tabata konsiderá e negoshi komo un kompania mediano-chiki. Pero 150 mion tabata hopi plaka.
Otro ehèmpel di kompania ku a laba miónes ta di un ku ta bende material di konstrukshon na Sürnam. Meskos via di un kompania di telekomunikashon a pasa miónes plaka di soborno pa yu muhé di presidente di Oezbekistan i e último tabata un kompania di fruta i berdura. Tur e negoshinan tabata riba papel lanta.
Ministerio públiko ta mira e pago di e suma ariba menshoná dor di ING komo un manera efektivo i na su lugá pa terminá e kaso. E suma di 775 mion euro ta konsistí di un suma di but di 675.000.000 euro, i ekspropiashon di 100.000.000 euro. Banda di esaki, e banko a tuma medidanan pa evitá ripitishon.

...Foto fail: dia 8 yüli 2015 momentu ku outoridatnan a tene inval den negoshi dje famia na Colombusstraat, i a konfiská basta mion na plaka kèsh i tambe por mira e kantidat di mashinnan di lanta plaka...