WILLEMSTAD.- Korte di promé instansia ayera a posponé un kaso di intento di asesinato.

Ta trata di e akusado B. Fransisca (32) ku ta keda akusá di a trata na kita bida di mama di su yu di fam Hermelijn.

Segun e akusashon dia 28 di mei 2020 e akusado lo a tira riba mama di su yu ku un arma di kandela.

Tambe e ta keda akusá di a menasá e dama i tambe un otro víktima dor di bisa nan “Mi ta tira bosnan tur dos mata".

Pa loke ta trata e di 3 akusashon Ministerio Publiká ta akusá Fransisca pa poseshon di arma.

Siman pasá e akusado a keda pon’é den libertat inmediatamente, despues ku hustisia a lubidá kompletamente riba dje.

Su kaso a bin dilanti anteriormente kual korte a posponé pa hasi mas investigashon, mirando ku e akusado ta insistí ku e no a tira riba e dama.

Pero mas di 4 luna a pasa i Ministerio Públiko a lubidá di bolbe presentá e kaso segun prosedura pa wak kiko a sali for di e investigashon. Mirando esaki su abogado mr. Osepa a entamá un kaso kual hues a bai di akuerdo pa pone e akusado den libertat inmediatamente.

Ayera e kaso mester a wòrdu trata integralmente pero pa medidanan di COVID a keda posponé.