WILLEMSTAD.- E kaso di Reykies Basilia (34) un bia mas a keda posponé ayera den korte di apelashon pa bolbe bai pro forma pa di 5 bia.
Reykies a keda kondená na 16 aña pa un kaso di atrako ku morto ku a tuma lugá dia 5 aprel 2015. E akusado a apelá su sentensia i a para riba ku e no tin nada di aber ku e atrako en kuestion.
Polisnan a kanta bingo ora ku a detené Reykies pa otro kaso i hasi un investigashon di su rastronan di dede ku a kuadra presis ku esun ku nan a haña 5 aña pasá riba e kluis ku a keda di bres den e víktima su bibienda na Rio Magdalena.
Ta trata di e atrako ku a resultá den asesinato di Fransisco “Pachi” Sambre di 90 aña ku a bira víktima di un atrako brutal i violento ku a kondusí na su morto.
Segun outopsia, e malechornan a sera e víktima su nanishi ku algu, mara su mannan i su pianan ku wayanan di koriente i despues tape pone riba kama.
E víktima a muri di stek mirando ku e no por a hala rosea.
Hues durante tratamentu di e kaso anterior a bisa ku no a haña rastro di dede di Reykies niun kaminda riba kurpa di e víktima.
Pero a haña otro rastronan di dede ku ainda no sa ta di ken.
Basilia semper a para riba su inosensia i a bisa ku e no tin nada di aber ku e kaso.
El a bisa ku e no konosé e víktima ni su famianan te pa e drenta den e kas.
Mas aleu el a splika ku e ta karpinté i a traha hopi banki di palu rònt banda bou. Durante e kaso el a bisa ku sea a kue su penk pone riba e kluis òf ta e palunan ku el a traha banki kuné.
Segun e famianan di e víktima, ta trata di un kluis di palu di mas di 50 aña ku e víktima mes a traha.
Pues ta imposibel ta un palu ku e akusado por a mishi kuné promé manera el a duna den su deklarashon.
Den e veredikto hues a duna di konosé ku e akusado no por a splika ki tipo di banki e tabata traha ni pa ken e tabata traha nan.
For di tratamentu di e kaso, hues a splika e akusado ku rastronan di dede ta úniko di un ser humano.
Pues ta imposibel ku un otro hende por tin mesun rastronan di dede òf a kue pone su dedenan ei nan.
Pa loke ta trata e vehíkulo Kia Spectra, hues a haña probá ku esaki tabata kuadra ku esun ku e testigu a deklará na polis.
El a bisa di a mir’é e anochi en kuestion pará di un manera sospechoso banda di e bibienda di e víktima. Durante interogashon na polis, e akusado a atmití ku en bèrdat e ta kore un Kia Spectra shinishi i a firma e deklarashon.
Pero durante tratamentu di e kaso el a bisa ku e outo tabata blou kla i tabata di su tata.
Hues a apsolvé e akusado komo esun ku a mara e víktima i tapa su nanishi ku a kondusié na su morto.
Pero hues ta di akuerdo ku e tabata na altura kiko tabata pasando, mirando ku a haña su rastro di dede paden di e kluis di palu den e kamber.
E kaso a keda posponé pa ougùstùs i lo keda tratá pro forma.