WILLEMSTAD.- Despues di 6 aña ainda kaso “Hato Shooting” ta andando den korte. E siman aki e akusado Curtley Basilia (33) kondená na 15 aña di kastigu, lo presentá den Hof despues ku el a apelá.
Basilia a keda akusá pa komplisidat i a provoká asesinato di Erwin Juliana alias Djais i tambe Shentley “Champi” Arnhem den e kaso ku a haña e nòmber “Hato Shooting” ku a tuma lugá dia 15 di yüli 2014 na Hato.

Ministerio Públiko a kategorisá Basilia komo esun ku provoká e asesinato ku a kousa un total di 3 bida entretantu den e suseso lamentabel en kuestion.
Basilia ta keda akusá tambe pa soborno di e eks polis Xavier de Windt, dor di a pag’é 30 mil florin pa saka informashon for di un trahadó di Hato, pa asina haña sa e orario i e dia ku Djais lo a yega Kòrsou pa asina e keda likidá.
Basilia a keda detené despues di 5 aña pa Interpol na Hulanda, pa responsabilisá su mes pa e akto aki i a keda trasladá pa Kòrsou.
Fo’i promé prinsipio e akusado a para riba ku e no tin nada di aber ku e kaso aki. Hustamente esaki ta e motibu ku el a apelá su sentensia, despues ku OM a hasi un demanda di 28 aña pe.
Anteriormente tratamentu di e kaso a bolbe wòrdu posponé pa falta di espasio i despues pa COVID-19.

E siman aki Hof lo presentá e kaso, pa e keda tratá integralmente.
Den e pro forma anterior, Basilia a bisa e tribunal di Hof ku e no tin nada di aber ku e kaso i ku e ta será kompletamente inosentemente.