Ministerio Públiko ta insistí

WILLEMSTAD.-  Kaso Venus mihó konosí komo “La Tasca” despues di dos aña ku e akusadonan a keda sentensiá, lo keda trata na yüni binidero den korte di apelashon.

Fiskal de Groot  di parti Ministerio Públiko, a bai den apelashon, despues ku e no tabata akuerdo ku hues den korte di promé instansia a apsolvé e akusadonan pa e asina yama “seksuele uitbuiting”.

Pues ku e damanan tabata keda obligá pa tene relashon seksual/ prostituí ku klientenan pa generá plaka i paga debe serka e akusadonan prinsipal.

E kondena ku e  akusadonan a risibí kompará ku  loke Ministerio Públiko a demandá, tampoko a kai den bon tera serka e fiskal.

Ministerio Públiko a akusá e pareha doño di La Tasca, M. i N. Koense ku tambe miéntras tantu ta den libertat, di tabata kometé trafikashon di hende, mal uso di poseshon kontra e víktimanan, tabata prohibí nan di tin kontakto, tabata laga nan kompartí un kamber chikí ku otro será na yabi, laga nan traha for di 10 or di anochi te ku 11 or di mainta sin pouze, sin kuminda 6 dia pa siman i tabata obligá nan sedusí e hòmbernan i tene relashon seksual ku nan kontra pago pa paga nan debe nan.

E eks agente polisial S. Seinpaal tambe a keda akusá pa kómplise den e kaso.

Tambe nan tabata keda obligá pa para riba sapatu haltu mas di 8 ora i duna servisio.

E damanan tabata haña but di 250 florin si nan sali for di e bar bai ku otro hende. Of si un kliente kier a bai ku un dama, e mester a paga 200 florin.

Ministerio Públiko ta akusá ruman muhé di e propietario, di tabata tene e damanan ilegal den bibienda i tambe kontrolá nan debidamente.

E akusado femenino Y. “Negra” M. de Hurtado tabata esun ku lo tabata reklutá e damanan na Venezuela pa nan bin traha na Kòrsou.

Durante tratamentu di e kaso, fiskal a splika ku tabata paga e damanan un salario di 125 pa 175 florin pa siman ku ta 2,50 pa ora ku ta kompletamente bou di pago pa lei.

Segun e kalkulo, e  akusadonan tabata gana mas o ménos 333 mil florin riba e damanan kitando tur gastu.

Mirando tur esakinan fiskal a haña tur e akusadonan kulpabel den e kaso aki.

Pa e pareha N. i M Koense fiskal a hasi un demanda di 5 aña, pa Leito 3 aña, Seinpaal 2 aña i pa M. de H. 18 luna di kual 6 kondishonal.

Den e veredikto hues a kondená e pareha N. i M. Koense na 30 luna di prizòn, de Hurtado na 9 luna di kual 3 kondishonal mas un periodo di prueba di 3 aña, e ruman muhé di e propietario na 18 luna di kual 6 kondishonal mas 3 aña di prueba i Seinpaal na 12 luna.

Tur sospechoso ta den libertat, pendiente pa nan kaso keda tratá den korte di apelashon despues di 2 aña.