WILLEMSTAD.-  E kaso ku a haña e nòmber “Lacerta” mihó konosí komo RDK, lo keda presentá den un oudiensia preliminar (“regiezitting”)  na Hof den e luna aki.

Ta trata di e kaso  kual e akusadonan  Gilbert Cijntje, Michelle Kinburn, Ashley Isidora i eks direktor di Rdk Roderick van Kwartel,  a keda kondená na kastigu di prizòn. Nan a keda akusá  pa korupshon na Refineria di Kòrsou (RdK). Tur 4 a apelá nan sentensia.

Nan a insistí  ku nan no ta di akuerdo ku e kastigu ku nan a risibí.

Ministerio Públiko a demandá Cijntje, Kinburn i Isidora na 4 aña, miéntras van Kwartel a keda demandá na 5 aña mirando su posishon i ku e lo mester tabata sa mihó.

Hues van Lieshout den e veredikto di korte di promé instansia, a desviá for di e demanda.

Hues a haña tur e akusadonan kulpabel  i a kondená Cijntje  Kinburn i  Isidora na  30 luna di prizòn i van Kwartel na 36 luna.

Den e veredikto hues a relatá ku nan a hasi nan mes kulpabel dor di pidi un suma grandi bou di mesa pa privilegiá un dje partnernan ku tabata interesá pa operá refineria na yanüari 2020.

Komo empleado públiko trahadó di RDK, nan a hasi mal uzo di nan posishon pa asina favoresé nan propio saku finansieramente, en bes di interesnan di pais Kòrsou i  su siudadanonan, segun e veredikto.

Tur kos a kuminsá despues ku minister presidènt Eugene Rhuggenaath a hasi un denunsia na OM di posibel korupshon di e akusadonan en kuestion.

E kaso lo bin dilanti dia 24  di sèptèmber binidero kaminda tantu Ministerio Públiko, komo  abogadonan por trese nan deseonan di investigashon pa despues e tribunal stipulá un fecha nobo pa e kaso keda trata integralmente. Remarkabel ta ku un di esnan den e kaso aki ta seráaktualmente pa otro kaso di labamentu di plaka i malversashon SVB/SWK.