WILLEMSTAD.- E siman di 18 di yanüari i 25 di yanüari 2021 binidero, a bira e dos simannan definitivo pa tratamentu di kaso Maximus den apelashon. Ayera Hof a bolbe presentá e kaso den pro forma, pa wak si tin deseonan di investigashon òf Novum.

Abogado Sulvaran a bisa ku e no tin niun deseo di investigashon i ta kla pa tratamentu di e kaso. Jamaloodin ku tambe tabata presente a laga tur kos den man di su defensa.

Hof a bisa ku lo no bai trata e kaso na e aktual “Kas di korte” pa motibunan di seguridat. E siman di dia 18 yanüari 2021 lo inisiá ku e echonan,   sirkunstansianan personal i lo skucha testigunan durante tratamentu di e kaso. Djaluna 25 di yanüari lo tin rekisitorio di Ministerio Públiko henter dia. E siguiente dia defensa lo hiba palabra i e otro dianan lo tin réplika i  dúplika. Febrüari lo sera e kaso i na komienso di mart korte lo tuma desishon.

George Jamaloodin (52) a apelá su sentensia  di 28 aña pa motibu ku e ta insistí riba su inosensia den kaso di e morto di Helmin Wiels.

Den e tratamentu di pro forma anterior, el a bisa Hof, ku pe ta hopi importante pa nan pasa den e dosié hopi bon i p’esei e ta roga e tribunal pa wak tur kos manera mester ta.

El a splika ku ta algu hopi duru pa ta será den prizòn siendo inosente.

E tribunal a bai di akuerdo pa skucha Boutisma, Maria i Fonseca durante tratamentu di e kaso.