WILLEMSTAD.- Ayera korte di apelashon a trata kaso Lacerta, mihó konosí komo kaso RDK den oudiensia preliminar.
Pa ku e kaso aki Ministerio Públiko ta akusá G. Cijntje, M. Kinburn i A. Isidora ku a keda kondená na 30 luna di prizòn den korte di promé instansia i tambe R. van Kwartel eks direktor di RdK, ku a keda kondená na 36 luna.
Tur e akusadonan a apelá nan sentensia pa motibu ku nan ta para riba nan inosensia.
E akusado A. Isidora tabata e úniko ku a presentá den e kaso resientemente.
E kaso a tabatin un durashon hopi kòrtiku, debí ku ya e deseonan di investigashon a wòrdu hasí kaba algun luna anterior.
Apesar di esaki, abogado Ayubi ku tin e defensa di Cijntje, Kinburn i van Kwartel, tabatin dos deseo di investigashon.
Segun e abogado e ke algun dokumento ku reshèrshi ainda no a entregá i tambe e ke pa skucha un testigu na Merka, ku tabata den e grupo di Bos i Bollebaker di e kompania Count. Pa loke ta trata abogado Blonk ku tin e defensa di A. Isidora, el a pidi pa algun dokumento mas i tambe pa entregá Isidora su pasport, pa e por bai fakansi ku su yunan.
Abogado general mr. Angela, no a oponé su mes kontra e petishonnan di e abogadonan.
Despues ku e tribunal a retirá pa ba deliberá, nan a bin bèk i bisa ku nan ta bai di akuerdo ku e petishonnan di ámbos abogado.
Pa loke ta trata e pasport, e tribunal di Hof a bai di akuerdo pa Isidora haña su pasport desde 1 di yüli i tin ku entreg’é bèk dia 1 di ougùstùs binidero.
Ministerio Públiko ta akusá e grupo di akusadonan pa korupshon na Refineria di Kòrsou (RdK).
Segun e akusashon, e akusadonan komo empleado públiko a ofresé nan mes na Bos i Bollebakker di e kompania Count, pa kontra di pago nan hasi posibel pa e kompania Count bira e partner stratégiko nobo di Refineria di Kòrsou, a kambio ku nan lo sòru pa Count bira e partner stratégiko nobo di RDK, òf esun ku lo haña e preferensia den e trayekto, durante e prosedura di selekshon pa un partner nobo.
Dia 21 di sèptèmber próksimo korte lo trata e kaso integralmente.