WILLEMSTAD.- Dia 10 di yanüari próksimo  korte di  apelashon lo  presentá kaso di e residivista Karel Vrutaal(28) nase na St Maarten den pro forma un bia mas.

Karel a keda kondená  na un kastigu di 10 aña mas 20 luna pa violashon seksual di 4 dama , entre nan 1 menor.

Durante di e kaso pro forma anterior, Vrutaal a presentá den sala di korte pia abou.

El a indiká na e tribunal di Hof ku e no ta dispone di kos di bisti na su pia pa motibu ku tantu su slòf komo su kèts ta tur gastá.

Tambe el a bisa ku e no sa haña bishita.

Vrutaal a duna di konos’é ku el a apelá su sentensia pa motibu ku e kastigu ta demasiado haltu i ku e mester di yudansa mental.

Segun e abogado Vrutaal  ta uza remedi pa Schizophrenia.

Abogado general despues di a tende e historia di Vrutaal a bisa e abogado ku e lo sòru di buska e historia di e akusado i wak kon por yud’e.

Na polis Vrutaal a atmití ku el a tene relashon ku e damanan kontra nan boluntat.

Segun Vrutaal el a sinta hopi aña di kastigu  anteriormente i ta kere ku ta un trampa nan a traha pe.

Pa loke ta trata un di e víktima nan, Vrutaal a bisa  ku e no a viol’é pero a tene relashon seksual kuné.

Den korte di promé instansia el a splika ku e ta kompletamente kontra di violashon.

Un otro víktima e akusado a bis’e ku el a kaba di sali for di prizòn i tin hopi gana di hasi sex.

El a bai kuné den outo lòk e porta nan, menasa e dama  ku e tin un arma kuné i ku e tin ku tene relashon seksual .

Vrutaal ta keda akusá di a violá un damita menor di edat ku ta  amiga di su eks frei.

Durante tratamentu di e kaso, akusado a bisa ku e sa ku el a faya ku e damita paso e no tabata ker a tene relashon kuné ainda, pero tòg a fòrs’e.

Dos luna promé ku e kaso bin dilanti, Ministerio Públiko a akusá Vrutaal di  a obligá  un otro víktima pa tene relashon seksual kuné bou di menasa i violensia.

Ministerio Públiko a relatá ku den un siman un di 4 damita a bai polis i a hasi denunsia ku e akusado Vrutaal a trata na viol’é.

Mirando tur esakinan korte a yega na e kondena ariba menshoná.

E kaso di Vrutaal lo bolbe keda presentá  den pro forma den korte di apelashon dia 10 pa tende kiko abogado general ta bai bisa di e investigashonnan ku e mester a hasi i tambe lo tende e fecha nobo ku e kaso lo keda trata den su kontenido.