WILLEMSTAD.- E kaso di skuchamentu di fiskal Italiano, Roberto Pelicano na Italia den kaso di lider polítiko di MFK, Gerrit Schotte ta kontinuá te ku mart di 2020. Awor t’asina leu ku ta bai manda e lista ku 14 pregunta pa un komishon Rogatorio di Korte di Italia, pa por interogá Pelicano.
Gerrit Schotte kende ta sintando kastigu di 3 aña di prisòn den kaso Babel i su partner Cicely van der Dijs a entamá un proseso sivil pa skucha e fiskal italiano aki. Nan ta di opinion ku fiskal di Kòrsou van der Schans ku tabata na kabes di e investigashon lo no ta papiando bèrdat ku el a haña informashon di Pelicano. Van der Schans a indiká semper ku Pelicano a manda mail p’e di dokumento ku a haña den kas di amigu di Schotte, Francesco Corallo na Italia durante entrada hudisial. E dokumento aki lo a kondusí ku a start ku investigashon kontra di Schotte. Ora ku Schotte i van der Dijs a pidi mail pa klarifiká un ke otro, sr. van der Schans a bisa ku e mail a “pèrdè”. P’esei e duda si en bèrdat fiskal Pelicano a tuma kontakto ku van der Schans i a mand’é e mail en keustion. Ku e kaso sivil aki, Schotte i van der Dijs ke logra di haña un daño i perhuisio di gobièrnu, pasobra lo tabatin un echo inhustisia kometé kontra di nan si resultá ku no tin mail ku Pelicano a manda pa van der Schans. E sentensia den kaso di Pelicano lo no kambia nada na e kondena di Schotte.
Dia 28 febrüari 2019 hues a bai di akuerdo pa skucha e fiskal mayó italiano.
Den luna di yüni mester a skucha Pelicano komo testigu den e kaso aki riba petishon di Schotte i van der Dijs. Sinembargo e dia mainta ei, algun minüt promé ku trata e kaso, Pelicano a bisa ku e no ta bai deklará via di sistema di “videoconference”, pero ke hasi su deklarashon ante di un Komishon Rogatorio. Hues a palabrá ku defensa di Schotte i abogadonan di gobièrnu ku despues di un luna mester entregá preguntanan na hues p’asina por manda esakinan Italia.
Den dianan ku ta tras di lomba, hues a saka un desishon, kaminda awor si tur pregunta ta bai ser mandá pa korte na Italia pa hasi e interogashon di Pelicano. Ta trata di 14 pregunta ku ta trata asuntu dje famoso “e-mail” na aña 2012.
E preguntanan ta ser mandá na Minister di Asuntunan di Eksterior pa bai ofisina di Korte na Roma, Italia. Aki lo interogá Pelicano. A pone komo kondishon ku Pelicano no por keda sin kontestá preguntanan ku ser hasí na dje. E kontestanan mester keda poné den un prosèsverbal ku tin di yega Kòrsou ku pòst.
Hues a disidí pone e fecha di 6 mart 2020 pa kontinuashon di tratamentu di e kaso. E momentu ei ya e prosèsverbal di interogashon di Pelicano mester a yega Kòrsou.