UPDATE: Famia a bai kasa mortuario

WILLEMSTAD.-Kontinuando ku e kaso di asesinato ku a tuma lugá awe mainta den e área di Paradeis, ta asina ku a pidi asistensia polisial na kasa mortuario debí ku un grupo hopi grandi di famia a presentá na e sitio. EXTRA a komprondé ku e famia tabata den un situashon hopi emoshonal i a pidi asistensia polisial pa asina tene e situashon bou di kontròl. Mas detaye den edishon di EXTRA.

UPDATE:Korsou a konosé prome kaso asesinato

Bosero di Kuerpo Polisial Imro Zwerwer a konfirmá ku un hòmber di Korsou a haña vários herida di bala den e kaso di tiramentu manera indiká. E hòmber a fayesé na e sitio mes. Polis ta konfirmá ku ta trata di un diskushon ku lo a kuminsá den un klup nokturno pegá eibanda i ku e diskushon a bai kaba pafó ku e resultado ya menshoná. Esaki ta bira e prome kaso di asesinato di 2020. Forsa na famia dje defuntu.

Kaso tiramentu fatal

WILLEMSTAD.-Informashon ku EXTRA ta disponé di dje ta indiká ku awe mainta tempran polis a bai atendé un kaso di tiramentu ku a tuma lugá riba F.D. Rooseveltweg den área di Paradeis. E prome informashonnan ta indiká ku den e kaso di tiramentu aki un persona a resultá gravemente herida. No ta konosí kiko ta e motibu di e akto aki, pero personal di ambulans ku tambe a yega hopi lihé na e sitio pa duna asistensia no por a hasi muchu pa e víktima.

EXTRA ta pendiente informe ofisial di parti di Kuerpo Polisial, pero manera indiká esaki ta parse di bira e prome kaso fatal pa 2020 ku a tuma riba Rooseveltweg na altura di e sukursal di PSB Bank. Asina tin e parti ofisial di polis EXTRA lo duna mas detaye di e kaso.