Faktor di preokupashon pa AJJC

WILLEMSTAD. - Despues di 5 aña trabou duru pa konstruí, ketu bai “Stichting Ambulante Justitiële Jeugdzorg Curacao”  (AJJC) ta nota ku falta hopi, falta basta pida pùzel pa sera e kuadro.

Konforme e relato anual 2019 di (AJJC), nan ta mustra riba entre otro kon e kantidat di kasonan di hóbennan ku ta kai den kriminalidat a baha, pero tòg tin un faktor importante ku ta preokupante, esta ku e kasonan ku tin, a bira muchu mas kompliká.

Loke ku tambe ta forma parti di e pùzelnan ku falta, ta e limitashon di presupuesto ku AJJC ta poseé di dje i e situashon problemátiko aki no ta AJJC so ta eksperensiá, pero e otro partnernan ku AJJC ta traha kuné tambe ta pasa den momentunan difísil ku un presupuesto  limitá.

No tin perspektiva pa futuro adekuá pa e hóbennan ku kai den kriminalidat. Ku esaki AJJC ke mèn ku no tin trabou pa e hóbennan, no tin enseñansa ni tampoko bibienda pa e grupo aki.

Tur esakinan ta piesanan di pùzel ku falta ku ta vulnerabel pa e hóbennan di riesgo.

Un gran parti di e hóbennan i nan mayornan ta karesé di abilidat sosial i òf pedagógiko.

Un otro aspekto mas ku ta di sumo importansia ta ku no tin aktividat grátis pa e hóbennan por okupá nan mes den nan ora liber.

E puntonan ariba menshoná ta forma parti di e metanan ku AJJC tin nan dilanti pa traha ariba i asina trata di sera e kuadro ku e pùzelnan ku falta mas tantu posibel.

Pa logra esaki, AJJC lo sigui traha mas ainda riba nan efektividat i bin ku un aserkamentu integral pa e hóbennan.

AJJC ta positivo pa loke ta trata nan plan pa e aña benidero, pa motibu ku ya e tim di AJJC a demostrá esaki. E kolaboradornan di AJJC a sòru pa kambionan drástiko i nan esfuerso i trabou na bienestar di nan klientenan hóben, a sòru pa un aña eksitoso.

For di aña 2014 e kolaboradornan di AJJC tabata krusial, den nan diseño kaminda ku nan a pone e hóben sentral.

AJJC ta di opinion ku nan so nan lo no yega leu, pero huntu tur lo yega hopi leu.