WILLEMSTAD. - Presensia di COVID-19 tabatin su influensia pa loke ta trata kasonan entrega na Korte di Promé Instansia. E kantidat di kaso total entrega na Korte den Promé Instansia ta 26.643, ku ta 32% ménos ku e aña promé. Esaki ta sifra di tur e kortenan den Karibe Ulandes.

Pa loke ta trata Kòrsou, na aña 2020 12.206 kaso a keda entregá, miéntras ku na aña 2019 a entregá 20.018 kaso.

Esaki ta bin pa motibu ku un dado momentu ku e balinan sentral a sera i no tabata posibel pa entrega kaso. Despues a krea posibilidat via di sistema digital p’asina tòg sigui duna kontenido na e derecho di estado.

Pa loke ta trata kasonan di apelashon na aña 2020 esaki a baha ku 18% kompará ku aña 2019. Esaki ta konta pa tur e kortenan. E baha aki por a ripará tur tereno di prosesonan hudisial.

Na aña 2020 tabatin un total di 1.087 kaso entamá na Korte di Apelashon, miéntras ku na aña 2019 esei tabata 1.327.

Pa loke ta trata Kòrsou na aña 2020, 539 kaso a keda tratá den apelashon, miéntras ku na 2019 esei tabata 612 kaso.

Tin diferente motibu ku e kasonan a baha, primeramente  pa motibu desishonnan tumá di parti di gobièrnu, pero di otro banda por t’asina tambe ku e gastu pa bai den apelashon, prinsipalmente pa kasonan sivil ta hopi haltu.

Esaki ta pone ku un hende ta pensa bon promé ku e apelá un kaso den Korte di Apelashon.