WILLEMSTAD.- Kasonan penal mester keda atendé i finalisá den un plaso rasonabel. Esaki a sali for di un investigashon ku Raad voor de Rechtshandhaving /Konseho pa mantenshon di lei ta bisa.

Konseho pa Mantenshon di Lei (di awor padilanti: RvR) a realisá un investigashon riba diligensia den atendementu di investigashon penal.

Tin vários disposishon den e leinan di Pais ku ta indiká ku kaso penal mester keda atendé i finalisá denter di un plaso rasonabel. Segun Konstitushon di Pais Kòrsou, un persona ku wòrdu privá di su libertat mester wòrdu enhuisiá denter di un plaso rasonabel (artíkulo 17, insiso tres, di Konstitushon di Pais Kòrsou). Kódigo di Prosedimentu Penal di Kòrsou (WvSv) ta fiha diferente plaso ku Ministerio Públiko (OM) mester kumpli kuné estriktamente den kuadro di priva libertat, i lei ta obligá e organisashonnan en kuestion di fiha maneho pa por kumpli ku e eksigensianan ei. Ademas un maneho asina lo yuda fomentá transparensia di e organisashonnan enkargá ku investigashon i kontribuí na siguridat hurídiko di tantu e outornan komo e víktima.

Ministerio Públiko (OM), Kuerpo Polisial Kòrsou (KPC), Landsrecherche Curaçao (LrC) i Recherche Samenwerkingsteam (RST) no tin maneho ku ta fiha plaso pa durashon di nan kasonan penal.

Aunke no tin maneho, diferente grupo di guia a wòrdu lantá den kadena hudisial pa duna guia na e investigashonnan penal, tantu na nivel stratégiko komo na nivel táktiko i operashonal. E gruponan akí ta priorisá i monitoriá e kasonan penal. E echo ku e organisashonnan enkargá ku investigashon a lanta diferente plataforma di konsulta, entre otro pa duna guia riba tereno di durashon di e kasonan penal, ta algu ku RvR ta konsiderá positivo.

E investigashon a mustra ku e organisashonnan (OM, RST, LrC i KPC) ta konfrontando reto pa loke ta kapasidat di personal. Apesar di esei, KPC, OM i RST ta bou di impreshon ku e investigashonnan penal ku nan ta kondusí no ta tarda irasonablemente pa wòrdu finalisá. Na LrC sí, aparentemente, falta di kapasidat di personal sa afektá e rapides ku kual ta atendé e kasonan penal. Den práktika, ta manehá e falta di personal pa finalisá e investigashonnan na tempu. KPC por ehèmpel, ta risibí sosten di RST i di Koninklijke Marechaussee (KMar) den investigashon di kaso penal.

No opstante, RvR ta di opinion ku kada organisashon enkargá ku investigashon mester disponé di su propio kapasidat di personal, di akuerdo ku loke tin fihá den su plan di strukturashon.

KPC i LrC ta enfrentá falta di ekipo moderno di investigashon. Falta di ekipo por pone ku un investigashon ta sufri mas retraso di loke ta nesesario. Den práktika, e riesgo ei ta wòrdu redusí ya ku e organisashonnan ta risibí sosten, entre otro di RST i KMar, ku sí ta disponé di e ekiponan nesesario. RvR ta di opinion ku mester pèrkurá ekipo adekuá, na un manera struktural, pa e organisashonnan enkargá ku investigashon.

No tabatin manera pa konfirmá ku e organisashonnan enkargá ku investigashon no ta tarda irasonablemente pa kaba di atendé nan kasonan penal. Esei ta debí ku e organisashonnan no ta tene registro di e fecha ku e kasonan penal ta drenta i sali serka nan. RvR ta di opinion ku ta bon pa e organisashonnan tene registro di entrada i salida di nan kasonan penal. RvR ta mira e falta di dato enkuanto durashon di kaso penal den kadena hudisial komo un defisiensia.