WILLEMSTAD.- Durante kasonan di mula korte di promé instansia a trata kaso di un akusado ku no tabata presente.
Ta trata di un akusado maskulino ku ta keda akusá di a trata na eksportá koka den su tas di lomba pa Hulanda.
E no a presentá pa responsabilisá su mes pa su akto, pero korte a bai di akuerdo pa trata su kaso tòg.
E ta keda akusá di a eksportá 796 gram di koka pa Amsterdam.
Durante un kontròl, e personal di duana a haña e droga den tas di lomba di e akusado. Nan a kontrolá e tas debí ku e tabata demasiado pisá.
Na polis el a keda ketu i a bisa di ta hasi uso di su derecho di keda ketu.
Uniko kos ku el a deklará ta ku ta su mama a kumpra e ticket pe pa e bai keda serka su ruman hòmber.
Fiskal a haña e akusashon probá i a demandá e akusado na 18 luna di kual 9 kondishonal ku un periodo di prueba di 3 aña.
Hues den su desishon a bai kompletamente di akuerdo ku e demanda di fiskal.