WILLEMSTAD.- Gerrit Schotte ta un polítiko bon konosí na Kòrsou i den e periodo di e akusashonnan e tabata mandatario. Schotte a funda  partido MFK i entrante 10 òktober 2010, e loke a bira asina konosí komo 10-10-10 ku nasementu di pais Kòrsou, el a bira e promé Promé Minister di Kòrsou. E funshoná aki el a ehersé te ku fin di sèptèmber 2012. E otro akusado den e kaso ki ta e partner di bida di Schotte ku ta Cicely van der Dijs.

Korupshon gubernamental ta para sentral den e kaso kontra Schotte. Hof a haña proba ku Schotte a tuma ‘regalo’ insistiendo di sumanan grandi di plaka di su amigu italiano negoshante. E ‘regalonan’ aki tabata destiná pa haña Schotte asina leu pa e hasi algu bek komo pago. Pa skonde for di unda e plakanan a bini e akusado a traha fakturanan falsu. Hof a haña ku e pareha a hasi nan mes kulpabel na labamentu di plaka i tambe nan tabata den poder di e asina yama ‘frequency jammers’. E ‘jammersnan’ ta prohibí pa lei i e meta ta pa stroba telekomunikashon.

Awe korte di Kasashon a dikta sentensia den e kaso kontra Gerrit Schotte i su partner di bida. E desishon di kasashon ta indiká ku e kastigu ku a keda dikta anteriormente ta keda para, sin kita sin pone. Esei korte di Kasashon a dikta awe. Tur kastigu ku a kai den e kaso di korupshon i labamentu di plaka ta definitivo awor.

Schotte a keda sentensia na un kastigu di prisòn di 3 aña i banda di esei pa un periodo di sinku aña e no por pone su mes eligibel riba niun lista polítiko. Pa loke ta trata su partner di bida, korte a sentensia na un kastigu di prisòn di 15 luna di kua 6 luna kondishonal esaki ta pa labamentu di plaka.

Den Kasashon, e pareha a mustra ku e ‘regalonan’ no tabatin soborno komo meta. E ‘regalonan’ tabata destiná komo yudansa finansiero pa e lanta su partido polítiko. Korte di Kasashon ta haña proba ku e ‘regalonan’ tabata destiná pa haña un trato preferensial una bes Schotte haña funshonnan polítiko. . korte di Kasashon ta haña ku su motivashon ta korekto. Mas detaye den edishon di EXTRA.