WILLEMSTAD. - Tabata desèmber di aña pasá ku e notisia a plama ku dos kurasoleño a keda likidá den nan outo na Rotterdam. E dia ei e dos víktimanan Gilbert Henriette (26) i Lindomar Elizabeth (25) a keda likidá ora ku un outo a pasa den nan banda i basha bala riba e outo, kaminda ku e dos kurasoleñonan aki tabata sintá aden. E dia ei Gilbert tabata e blanko, miéntras ku Lindomar tabata na e sitio robes na e momentu robes.

Den nan investigashon polis a pone 15 mil euro pa e tep di oro pa por aresto esnan responsabel. Mester indiká ku e suma di plaka aki a duna su resultado ora ku polis a pasa un video via di e programa “Opsporing Vezocht”, kaminda ku por a mira algun persona ta kana pasa banda di un outo stashoná den un kaya na Rotterdam. E personanan a drenta den un outo Audi ku tabata stashoná algun outo tras di e outo di nan víktima. Nan ta pasa den nan banda i ku un AK-47 Kalasjnikov a kaba e lachi di bala riba e outo.

Polis ta logra arestá e hòmber Rolly P. ku a atmití ku el a likidá e dos hòmbernan sintá den nan outo. Riba un tep anónimo polis a haña tambe e arma potente den kas di Rolly.

E akusadonan ku a hasi nan mes kulpabel pa e asesinato aki tabatin 17 i 18 aña di edat dia ku nan a kometé e krímen.

Polis a logra arestá kuater persona mas ku tabata esnan ku a duna òrdu di likidashon. E likidashon ta relashoná ku un ‘ripdeal’ di droga ku a tuma lugá algun tempu atras.

Tur e akusadonan edat ta hopi hóben, tin un di 15 aña di edat ku korte a trata ku porta será. Esaki a haña libertat pa asesinato, pa motibu ku e no tabata direktamente afiliá na e asesinato, pero a keda kondená na 40 ora di kastigu alternativo pa un maltrato severo ku e hóben di 15 aña aki a kometé.

Un otro hóben di 17 aña di edat a keda kondená na 2 aña di detenshon hubenil, e tabata den e outo momentu di e krímen.

Rolly P. (19) a keda kondená na 25 aña prizòn, fiskal su demanda tabata 30 aña i Yassine B. (18) a keda kondená na 20 aña prizòn kaminda ku fiskal a pidi pa e bai será 25 aña.

Tur e akusadonan aki a keda konsiderá mentalmente debil i ku e chèns riba residivismo ta grandi i tur kos ta indiká ku no tin muchu futuro pa e grupo di hóbennan aki.