WILLEMSTAD.-‘Fuikdag’ a bira otro momentu di selebrashon grandi na Korsou. Mesora tin esnan ku ta probechá di kada oportunidat ku presentá pa kometé nan fechorianan. For di ayera EXTRA a tuma nota di kantidat di hende ku a keda perhudiká òf mihó bisa nan a bira víktima di estafadónan. Tin hopi turista tambe ku a bira víktima i den e kuadro ei EXTRA a haña informashon ku Ofisina di Turismo huntu ku Polis ta uni forsa pa atendé ku man duru kontra estafadónan aki. Algun minüt pasá a entrega keho ofisial na polis pa estafa.

Manera EXTRA a informá den su edishon, tin diferente hende ku a ofresé turistanan i hendenan lokal e posibilidat pa bai Fuik riba un boto i disfrutá di tur servisio komplementario, kontra pago di sumanan basta fuerte. Por a tende ku tabata kobra 375 euro i tambe 1000 florin pa kabes. Sinembargo tin hopi hende ku a bira víktima pasobra nan no a haña boto ni niun di e servisionan primintí.

E mal nòmber ei no ta bon pa Korsou i den e kuadro ei minister McWilliam a konfirmá pa EXTRA ku ya kaba a pidi polis huntu ku Ofisina di Turismo pa hasi tur loke ta na nan alkanse pa atendé ku e malechornan aki.

Relashoná ku e kaso aki EXTRA a tuma kontakto ku Ministerio Públiko i a komprondé ku tur denunsia ta drenta serka polis. Te ainda OM no a tende di niun denunsia, asina e bosero di Minister Públiko a duna di konosé. Buskando mas leu EXTRA tabata den kontakto ku departamentu di komunikashon di polis kendenan a informá ku nèt prome ku mèrdia a drenta keho na polis kontra esnan ku a kometé estafa. Mas tempran no tabatin denunsia ku a drenta, pero nèt prome ku mèrdia esei a sosodé. Ta nifiká ku awor polis por bai investigá e kaso. Mas detaye den edishon di EXTRA.