WILLEMSTAD.- Abitantenan den Menegrandeweg na Rio Canario i bisindario ayera a hasi entrega na minister Zita Jesus-Leito di un keho kontra e komersiante den e kaya menshoná ku pa nan ta iresponsabel ora el a destruí palunan den e kaya ei. E abitantenan ta denunsiando e akto aki pa algun siman kaba i ni maske kiko nan a hasi e komersiante a sigui ku e trabounan i a kita delaster un palu den e kaya ei. Palunan di mas di 60 aña  bieu ku tin un balor inmenso. Ayera minister Zita Jesus-Leito mes a presentá i e por a testiguá e destrukshon ku a tuma lugá.

Den presensia di e propio komersiante aki, minister a bisa ku no ta posibel ku un hende ta kap palu den un bario sin pèrmit. E parti aki e ta haña kondenabel i p’esei el a hasi keho pasobra no por.

E bario a laga sa kon malkontentu nan ta i hendenan ku tin hopi tempu ku ta biba einan i ta gosa di e ambiente i e mester ta ehèmpel pa Kòrsou kompleto ku e  kos aki no por pasa.

Un habitante a hasi entrega di e dokumento na minister kaminda ta pidi e komersiante pa drecha bèk e situashon ku el a kousa. Nan ta haña esaki inaseptabel ni pa hende ni pa medio ambiente. I e abitantenan ta spera di por haña sufisiente atenshon di gobièrnu pa e kaso aki.

No solamente e bario pero asta e skol i otro empresarionan den e bisindario a uni pa hasi entrega di e dokumento na minister i asina por entregá e keho ofisial kontra di e komersiante.

Minister a bisa tambe na momentu ku el a risibí e dokumento serka e abitantenan ku e konosé e komersiante Melly Bergland hopi tempu i e no por a ferwaktu asina aki di dje.

Sr. Bergland a hasi uso di e oportunidat pa bisa ku e no ta na altura di esaki. El a bisa ku ta su responsabilidat loke a sosodé einan. El a bisa ku loke tabatin einan ta iresponsabel pa a keda asina. E palunan ta trese peliger i tur esei ta registrá na DOW. El a bisa ku te ta mantené  e plenchi ei i p’esei ta iresponsabel pa e lag’é keda asina. Kaminda el a kita e palunan el a bisa ku einan lo bin mas di 20 palu plantá. No solamente e lugá di ‘parkeerplaats’  i un lugá di hunga si e haña e pèrmit.

El a bisa ku e palunan tabata putrí, nan a kibra su lugá di parker outo, berpùt i yen komehein. Segun sr. Bergland ta un persona a papia kuné. I a dura 2 siman pa e limpia e tereno i niun hende a reklamá. Ta hopi alegashon i nada no ta bèrdat. E dañonan ku ta sosodé i ta registrá na DOW serka sr. Zink. El a bisa ku e ta para responsabel pa tur konsekuensia pero el a aktua pa bienestar di hende i nan outo.

Minister Zita Jesus-Leito a splika sr. Bergland ku el a hura di traha na bienestar di e komunidat aki i e tin di ehersé i sòru pa kosnan ku ta konta pa henter komunidat keda influensia. Tur hende tin bon intenshon, i sr. Bergland a bisa ku e tin plan pero miéntras e plan no keda aprobá i entregá, no por traha kosnan ilegal i hasi kosnan ilegal tambe. Esei minister a splika e komersiante na e sitio. El a bisa ku e ta responsabel pa sòru pa mantené i wak kiko a pasa. I den e kaso aki un hende por tin bon intenshon pero no por mishi ku loke tin den ‘Openbare ruimte’ sin pèrmit nesesario. Den e kuadro ei ya a hasi keho pasobra no por permití ku tur hende ta hasi manera nan ke. Minister ta kere ku kuantu impreshon i pensamentu ku hende tin e no por aktua asina aki. I esaki mester sirbi komo ehèmpel den komunidat. A base di loke a entregá na destrukshon di ‘Openbare ruimte’. E bario ta di tur i no di un so, asina minister a enfatisá.