WILLEMSTAD.- Dia 29 di ougùstùs 2023 Fundashon Peter R. de Vries na Hulanda a ofresé 100.000 euro pa e tep di oro ku lo yega na Mike Venema. Dia 12 di sèptèmber 2018 Venema (53) a disparsé na Kòrsou. Dia 5 di yüli 2019 a haña restunan mortal di Venema den laman. Fundashon Peter R. de Vries ta ofresé e montante pa haña informashon krusial tokante e último momentonan den bida di Venema. Pa bini na remarke pa e rekompensa aki e tep di oro mester ta drenta na e Fundashon promé ku 29 di febrüari 2024. Ku ta nifiká ku ta falta solamente algun dia.

Kelly de Vries di Peter Vries Foundation djaluna 19 di febrüari ta splika ku den e último 5.5 luna diferente tep a drenta tokante Mike Venema. Pero te ainda no tin tep di oro.

“Nos ta spera ku den e último dianan te 29 di febrüari hende por duna nos mas informashon. Nan por hasi esaki pa haña un konsiensia limpi, òf pa e montante di 100.000 euro. Pa nos ta importante ku nos sa kiko a pasa ku Mike.” De Vries ta splika ku lo ta bon si hende ku tin informashon krusial por tuma kontakto ku e fundashon mas lihé posibel.

Pa mas informashon di e kaso i tambe pa duna e tep di oro: https://www.peterrdevries.nl/cases/mike-venema-curacao/

Kiko a pasa?

Dia 5 di yüli 2019 un sambuyadó di piská a haña un Ford pikòp riba fondo di laman Karibense na Kòrsou. Den e vehíkulo a haña restunan mortal. Despues di investigashon a resultá ku bèrdat ta trata di Mike Venema. Despues di 5 aña ainda no ta evidente kiko a pasa.

Fundashon Peter. R. de Vries ta kombensí ku tin hende ku sa mas tokante morto di Mike i p’esei ta ofresé 100.000 euro pa e tep ku lo yega na e persona kulpabel.

Mike tabata biba den un apartamento na Anasaweg, pero promé ku e la disparsé e tabata kedando algun tèmpo den un kas na Jan Sofat (Resort). Ta aki ta delaster biaha ku hende a mir’é riba 12 di sèptèmber 2018.

Venema a nase na Heemskerk, Hulanda riba 4 di desèmber 1964 el a bin biba Kòrsou den aña 2009. El a traha den sektor di èrko i tambe tabata hasi vários trabou di plombero. Pero tambe el a traha poko tempu den un restorant i tabata ofresé asistensia (tékniko) na algun DJ riba isla durante anochi di fiesta. Tambe Mike tabata hür apartamento huntu ku otro hende na Kòrsou, kaminda e tabata hasi e mantenshon.