WILLEMSTAD.- No ta kumpliendo ku ordenansa finansiamentu di agrupashon polítiko elektoral manera mester ta. Esaki ta konklushon ku partido KEM ta yega na dje despues di a studia relato anual 2023 i relato di e transishon ku a tuma lugá na 2023.

Lider polítiko di KEM, Michelangelo ‘Low’ Martines den un karta fechá 15 sèptèmber 2021 a hasi pregunta na minister Ornelio ‘Kid’ Martina riba kumplimentu di e eksigensia pa tur kandidato polítiko ku a risibí 5 mil florin òf mas pa kampaña mèldu esaki. E minister a manda e preguntanan pa Konseho Supremo Elektoral i esaki na su turno a manda nan pa prokurador general.

25 yanüari 2022, Martines ta manda rekordatorio pa minister Martina pa e haña kontesta riba su preguntanan, pero te ainda esaki no a tuma lugá te ku prokurador general Ton Maan a baha ku penshun. KEM ta bisa ku Maan a baha ku penshun sin tuma akshon konforme e ordenansa di lei.

“Tantu bal broma ku a kumpli ku e ordenansa i tòg no tin sanshon pa esnan ku violá e lei aki. Segun KEM ta mayoria kandidato ku a partisipá na elekshon 2021 no a entregá e dokumento aki miéntras ku por a mira hopi di nan hiba kampañanan personal hopi elaborá.”

Tambe e relato anual ta menshoná ku ta solamente 2 partido a kumpli ku ordenansa finansiamentu di agrupashon polítiko (artíkulo 3 i 4). “E ordenansa aki, te ainda no ta kumpli ku motibunan di su introdukshon. Elekshon aña 2021 a konstatá diferente violashon i tòg ningun sanshon manera stipulá den e ordenansa aki.”

Mas aleu e partido ta bisa ku durante aña 2023, konstelashon di e Konseho a kambia na diferente okashon i ku mester aklará funshon di algun di e miembronan p’asina evitá konflikto di interes. Tambe KEM ke risibí e akuerdo relashoná ku organisashon di elekshon di Staten.

“Esaki mester sòru pa ta transparente, perspektivanan kla i pa partidonan traha huntu den kuadro elektoral.” Mas aleu Pueblo votadó tin nesesidat pa sa mas tokante Kas di Demokrasia su ubikashon, e partido ta sigui trese pa dilanti.

Mas asuntu relashoná ku edifisio ku ke informashon riba dje, ta hür di ofisinanan ku a oumentá kompará ku aña 2022 ku mas ku 10.000 florin. Konseho Elektoral a muda di WTC pa un adrès nobo na Scharlooweg 11, pero KEM ta haña e diferensia den preisnan di hür konsiderabel i ke risibí e kontrato di hür pa e edifisio nobo.

KEM ta interesá pa haña presupuesto 2024 i 2025 di Konseho Elektoral. Ke sa kiko a hasi ku e 2.811.900 florin pa organisá elekshon 2025 i ta mustra ku riba base regular Konseho Elektoral ta risibí alabes 595.400 florin serka gobièrnu di Kòrsou. Otro splikashon ku KEM ke ta riba oumento di pago di personal i miembronan ku 31.200 florin, oumento di mas o ménos 20.000 florin na salarionan i oumento di 34.700 florin na gastu di penshun.

KEM ke informashon tambe di fèn ku a kumpra pa e suma di 17.142 florin. “Ta insólito ku a kumpra i no hür fèn pa wardá nan un kaminda i usa nan solamente pa elekshonnan. KEM ke sa nan estado i si por usa nan durante elekshon 2025.”

Finalmente e partido ta pidi pa haña e “rooster” pa miembronan di e direktiva baha i informashon di fecha i aktividatnan relashoná ku elekshon 2025.

Foto:

...Michelangelo Martines...