WILLEMSTAD.- Parlamentario pa partido KEM, Anthony Godett a entregá un inisiativa di lei ku ta pone regla pa persekushon di polítikonan den funshon. E inisiativa di lei ta enserá ku Prokurador General mester bai Korte di Apelashon ku un petishon pa persiguí un polítiko den funshon, pues un minister òf un parlamentario. Ta solamente si Korte di Apelashon duna aprobashon, e persekushon por inisiá.

E lei akí ta eksistí na St. Maarten kaba. Pensamentu tras di esaki ta ku e konsekuensianan di persekushon penal di un polítiko den funshon ya kaba tin konsekuensianan hopi grandi pa e persona en kestion. No solamente ta suspendé e minister òf parlamentario na momento ku e kai den aresto preventivo òf haña kondena, pero na momento ku su kondena bira irevokabel ta sak’é for di su funshon.

Pa e motibu akí St. Maarten a introdusí pa lei ku mester laga Korte di Apelashon hasi un evaluashon kouteloso di e intenshon di Ministerio Públiko pa persiguí un polítiko den funshon promé ku esaki tuma lugá den práktika. Awor frakshon di KEM a bini ku un inisiativa di lei similar pa Kòrsou. Leinan konstitushonal di Kòrsou i St. Maarten sinembargo ta diferensiá un poko for di otro.

Na Kòrsou por ehèmpel, aresto preventivo di un parlamentario no ta lidia pa lei ku outomátikamente e ta suspendé. Ta solamente si e haña un kondena di korte i e kondena akí bira irevokabel ta sak’é for di funshon. Asina tin mas aspektonan konstitushonal ku mester a tene kuenta kuné.

Ta den e kuadro akí ku KEM a pidi un hurista profeshonal pa yuda hasi e kambionan den e inisiativa di lei ku entretantu ta kla. Godett ta bisa ku e frakshon a bira tambe esun promé pa hasi un apelashon riba e 100 mil florin ku a reservá riba presupuesto pa parlamento pa frakshonnan ku mester di asistensia profeshonal hasi uso di dje.

Durante tratamentu di presupuesto 2025 na desèmber aña pasá frakshon di Trabou pa Kòrsou a presentá ku un moshon pa pone e suma di 100 mil florin akí disponibel pa frakshonnan, spesífiko pa ora mester di asistensia hurídiko pa traha riba inisiativanan di lei. Godett ta bisa ku e sèn ku a pone disponibel akí frakshon ke kubri e gastunan di e hurista.

Godett ta lamentá ku no a logra tradusí e lei alabes na papiamentu. Esaki tabata deseo di e frakshon, pero e lo a dura muchu promé ku e tradukshon lo tabata kla. Awor ku a entregá e inisiativa di lei na parlamento lo manda esaki Hunta Konsultativo (”Raad van Advies”) pa despues inisiá e trayekto den parlamento pa trata i aprobá e lei.

Godett ta spera ku parlamento ta logra trata e inisiativa di lei promé ku e parlamento nobo tuma asiento na mei awor.

Foto:

...Momento ku parlamentario Anthony Godett a entregá griffier e inisiativa di lei...