LOS ANGELES.- Djaluna último Kenley Jansen i su fundashon, Kenley Jansen Foundation, tabatin un evento pa rekoudá fondo. E fundashon di e closer di Los Angeles Dodgers tin e intenshon pa yuda impaktá bida di famianan ku tin yunan ku malesanan serio i króniko. E intenshon ta proveé e famianan aki ku apoyo diariamente mediante fuentenan ku lo mehorá nan bida i tambe eksperensianan ku por kambia nan bida. Djaluna tabatin e evento ku a keda titulá A Night of Courageous Hearts.

Por a mira ku algun kompañero di ekipo di Kenley ku tambe a apoyá e evento aki manera Russell Martin i Clayton Kershaw. Riba kombinashon di foto por a mira tambe momentu ku Los Angeles Dodgers Foundation a entregá un chèk di 90 mil dòler na e fundashon di e yu di Kòrsou.

Tambe por a nota presensia di e mucha muhé sòftbolista, Stevie Wisz, kende resientemente a hasi un operashon na su kurason. Promé ku e operashon, el a wanta esaki pa motibu ku el a preferá di terminá su temporada di sòftbòl. E kaso aki tabata unu ku a hala Kenley su atenshon i ku e yu di Kòrsou a invitá Wisz na un partido di beisbòl na Dodgers Stadium kaminda nan por a sera konosí ku otro.