WILLEMSTAD.- Na Wageningen University & Research yu’i Kòrsou dr. drs. Kennedy Tielman M.ed a defendé su disertashon. E disertashon ku tambe ta kontené un resúmen na Papiamentu ta titulá “Diversity related (compe)tensions. A study into teachers’ self-perceived multicultural competence and experienced culturally loaden value-based tensions in Senior Secondary Vocational Education and Training”. Esaki a tuma lugá dia 16 di mei último.
Na Hulanda un di e preokupashonnan di e dosentenan di klas nan kulturalmente diversifiká ta e inkompatibilidat di norma i balornan entre nan i nan studiantenan i tambe entre e studiantenan mes, e asina yamá tenshonnan relashoná ku balornan. Pa e dosentenan di klas nan kulturalmente diversifiká,e tenshon relashoná ku balornan ta esnan di mas difísil pa manehá.

Kennedy Tielman a demonstrá ku su investigashon amplio bou di kasi mil dosentenan di 20 diferente skolnan MBO na Hulanda ku hopi dosentenan ta eksperensiá tenshon durante nan lèsnan den klasnan kulturalmente diversifiká. Tambe el a demonstrá ku konosementu di antesedente di studiantenan den e tipo di klasnan aki ta yuda pa enkontrá ménos tenshon. Esei tambe ta e kaso si dosente nan tin un mente habrí pa loke ta trata nan studiante nan y ta stimulá kontakto entre nan mes i e studiante nan i entre e studiantenan. Adishonal ela demonstrá tambe ku su investigashon ku pa loke ta trata MBO otro tipo i frekuensia di tenshonnan ta tuma lugá kompará ku skolnan sekundario.
Kompanianan tambe kaminda studiantenan ta kore ‘stage’ ta hunga un ròl esensial pa loke ta trata aktitut profeshonal i étika di e studiantenan. Un di artíkulonan di su disertashon a gana un premio internashonal komo e artíkulo ku mas a wòrdu di ‘download’ den su promé aña despues di publikashon (https://onlinelibrary.wiley.com/doi/full/10.1111/ijtd.12238 ).

E disertashon di Tielman ta halando hopi atenshon e dianan aki den prensa Hulandes. E Korantnan Trouw i Telegraaf a dediká atenshon na dje i tambe wepsait di notisia di NOS i Radio 1 broadcast.
Es mas, e resultadonan di e disertashon di sr Tielman a wòrdu usá pa un lei legislativo pa mas atenshon pa diversidat na MBO. Banda di su trabou komo ‘lerarenopleider’ na Fontys Hogeschool Tielman ta dunando diferente charla, workshop i ta train dosentenan di klasnan kulturalmente diversifiká i esei no solamente na Hulanda sino manera luna pasá tambe tabata e kaso na Estádos Unídos.
Pa tur informashon di e pasonan riba tereno sientífiko di Dr.drs. Kennedy Tielman M.ed. por akudí na su wèpsait personal www.kennedytielman.nl i wèpsait di Wageningen University & Reserach i Fontys Hogeschool.