WILLEMSTAD. - Tremendo akshon último tempunan di parti Kuerpo Polisial pa ku e kontròlnan di tráfiko ku ta tumando lugá riba un base regular. Tabata basta tempu ku no tabatin kontròl di tráfiko, loke ku a pone ku hopi outomobilista no tabata kibra nan kabes pa pone nan dokumentunan na òrdu. Ainda tin hopi vehíkulo riba kaya ku nan dokumentunan no ta na òrdu ku e konsekuensia, ku ora nan ta embolbí den un choke, e kontra partido ku si ta sigurá, tòg ta salí pèrdí.

Pa loke ta trata e último aki, por tuma nota durante e kontròlnan di tráfiko, ainda mas o ménos 50% di e vehíkulonan kontrolá, nan dokumentunan no ta na òrdu.

Djamars último, tabatin un kontrol di tráfiko ku a tuma lugá riba Pater Euwensweg. Na e okashon ei a kontrolá 55 vehíkulo di kua polis a repartí 24 prosèsverbal. Esaki ta algu ménos ku 50% di e vehíkulonan kontrolá.

Tabata personal di UST, ku a tene kontròl entre 6 or pa 7 or di anochi riba Pater Euwensweg. Manera menshoná a kontrolá un kantidat di 55 vehíkulo i a repartí 24 prosèsverbal pa entre otro, manehá vehíkulo sin, reibeweis, karchi di kùr bálido, seguro ku a kaduká, impuesto no pagá, no tin faha di seguridat bistí. Finalmente vehíkulo ku winshil di plak.

Kuerpo Polisial ta anunsiá ku e kontròlnan aki lo ta kontinuo.