WILLEMSTAD.- Ainda no tin huma blanku pa loke ta trata e trámitenan pa pago ku mester tuma lugá pa asina finalisá e transakshon di kompra di Plaza Hotel. E espektativanan ta hopi haltu i na mes momentu tin hopi ku ta bibando momentunan d basta tenshon, pendiente finalisashon di e benta.

Informashon ku EXTRA ta dispone di dje ta indiká ku ketu bai tur esnan embolbí ta pendiente. Mas ainda debí ku lo a duna e invershonista Thomas Bolera un espasio di tempu mas pa kaba di finalisá e transakshon. Punto ta ku tur hende ta pendiente pa tende si e sèn a yega Girobank pa kumpli ku e rekisito prinsipal despues di e findishi, esta pago.

Manera ta konosí algu mas ku tres siman pasa a bende Plaza Hotel un bia mas den un findishi, despues ku e promé findishi no a konkretisá ora ku e persona ku a gana den e findishi nunka mas no a paga e suma di riba 13 mion florin ku a palabrá. A sigui un proseso ku a dura bastante promé ku Girobank a keda kla pa un bia mas bai findishi ku e propiedat. Pa di dos okashon aki e instituto Cinex Curaçao tambe a hinka nan skouder bou di e proyekto i a yuda buska invershonista. E speransa ta ku a hasi e investigashon finansiero sufisientemente profundo pa Girobank i prinsipalmente Kòrsou no mester bolbe pasa un di dos kaso kaminda a bende e propiedat den findishi pero e kumpradó no tin sèn. Tur hende ta pendiente!