WILLEMSTAD.- Servisio pa Planifikashon Urbano (ROP) ta informá ku ta bai desmantelá e edifisio ubiká na skina di Keukenstraat i Sommeldijkstraat 8 den área di Punda. Esaki debí ku e ta forma un peliger pa abitantenan di e kaya, i tur ku ta move den su besindario.

Trabou pa desmantelá e edifisio ta kuminsá djaluna 14 di ougùstùs 2023, i ta bai dura 3 siman. Ta bon pa rekordá ku e edifisio aki no ta un monumento protehá, i debí na e estado di e edifisio e desmantelashon ta tuma lugá ku man i no mashin. Esaki ta motibu ku e ta bai dura 3 siman largu. Lo sera e kayanan konserní riba e dianan ku e trabounan di desmantelashon ta bai tuma lugá.

E edifisio aki ta un propiedat privá i e doñonan a risibí karta di VVRP pa tuma medida adekuá. Sinembargo, e doñonan no a hasi kaso na e instrukshon di Gobièrnu i pa e motibu ei, e edifisio su estado a sigui deteriorá.

Ekspertonan di ROP a hasi un investigashon profundo di e estado di e edifisio aki, i a konstatá ku esaki no por keda restourá mas. Konsekuensia di esaki ta ku mester basha esaki abou pa por garantisá seguridat di tur persona den e área.

A hasi diferente apelashon na nan pa hasi esaki, pero esaki no a resultá eksitoso.

Gobièrnu, komo esun finalmente responsabel pa seguridat di su siudadanonan, ta aktuá awor responsabelmente denter di kuadro di su tareanan legal. Ta bai kobra e doñonan di e edifisio aki debidamente pa e trabounan di desmantelashon.

ROP ta bolbe hasi un apelashon na tur doño di edifisio den nos sentro di siudat pa sòru di mantené nan edifisio den un bon estado pa asina evitá desgrasia i molèster pa hende por kana i/òf outo por kore.

Pa mas informashon por tuma kontakto ku ROP via info.rop@gobiernu.cw.