WILLEMSTAD.- Ayera un biaha mas polis a bai duna asistensia pa ladronisia/kiebro den outo. E bia aki a bai e lugá di parker outo na Bapor Kibra/Mambo kaminda a kibra den sigur tres vehíkulo. Un di nan a kibra glas i a kuminsá destruí e stürwil pa por a bai ku e outo aki. E malechornan no a logra. Di otro outonan riba e lugá di parker a bai ku bateria di esakinan.

EXTRA a tuma nota di e kiebro i ladronisianan den outo i di outo ta sosodé hopi bia riba lugánan di parker outo kaminda tin sentronan di dibertishon i tambe playa. Siman pasa a outo un hòrta na Kenepa i despues a haña esaki tur destrosá den mondi band’i Klein Hofje.

Algun siman pasa polis a tene un akshon kaminda na tres sitio nan a konsentrá i tabata para vehíkulonan pa konsientisá e shofùrnan riba ladronisia i kiebro di outo. Miéntras tantu e kasonan no a baha pero ta subiendo mas.

Ta bon pa outomobilistanan tene kuenta enpartikular den e fin di aña aki, kaminda malechornan ta mas aktivo ku nunka, pa para nan vehíkulo na lugánan ku por tin tráfiko di outo i hende. I loke ta masha importante aki ta tambe e kontrol sosial. Laga nos un tira bista pa otro i avisá polis asina nota algu sospechoso.