WILLEMSTAD.- E situashon aktual den kuadro di e pandemia ku nos pais ta pasando aden ta serio, i lamentablemente pa motibu di nos propio komportashon tin hendenan ku a fayesé i tin mas hende ku lo bai fayesé. Hopi di nos den e komunidat aki ta kuestioná e sifranan di COVID tur dia, si enberdat nan ta asina haltu, pero echo ta ku tin un kantidat di hende interná pa e malesa aki i echo ta tambe ku tin un kantidat ku a fayesé. I esei ta echonan ku no por keda kuestioná. Esei por a komprondé for di deklarashon di Promé Minister di Kòrsou sr. Eugene Rhuggenaath durante un enkuentro ku prensa ekstraordinario. Na e okashon aki tambe e mandatario a anunsiá e medidanan adishonal ku ta bai tuma entrante 2 di aprel i ku lo keda vigente te ku 16 di aprel.

Segun e mandatario, manera a bisa for di un aña pasá ora ku e menasa di pandemia di COVID a toka nos suela, a bisa ku un dje motibunan ku lo ta válido pa tur medida ku tuma ta pa evitá ku ta hasi impakto riba nos kapasidat di kuido médiko, pues na hospital. Mester kòrda ku den komunidat tin di reservá espasio pa esnan ku ta malu pa otro malesanan pero tambe pa COVID. T’asina ku e situashon na CMC a sigui empeorá, i lástimamente mester bisa ku no por sigui para ketu i mira mas hende bira malu i fayesé. Kada un di nos aki na Kòrsou entretantu mester konosé un hende ku tin òf a haña COVID, i simplemente a yega na un altura ku no por keda para wak sin hasi nada. Si wak e situashon na CMC, normalmente e tin un kapasidat di 16 kama pa Kuido Intensivo (IC) regular. Awor di akuerdo ku un plan di eskalashon, a krea 14 kama pa kuido intensivo regular i tambe 33 kama i aparatonan pa kuido intensivo dediká na pashèntnan di COVID. I por bisa ku tur e kamanan aki a yena. Te asta a manda buska personal èkstra lokal i djafó pa por atendé ku e kuido di pashèntnan di COVID i alabes pa CMC por keda duna servisio na pueblo. “E situashon ta serio!”, asina e minister a opservá.

Mas aleu el a splika ku ta tumando mas akshon pa ekspandé e kapasidat ku 15 kama i aparato. Pero ta premirá kaba ku esei lo no ta sufisiente i komo tal lo por krea mas espasio. Sehos tambe ta pendiente pa por usá loke nan tin na kapasidat. Pero sin personal adishonal ta tantu bal, pues por konsiderá ku aktualmente CMC ta den un situashon krítiko. Por nota kon CMC a hasi un apelashon riba komunidat pa haña personal adishonal. Segun e mandatario, e no sa kiko mas mester sosodé pa proba ku e situashon di COVID na Kòrsou ta krítiko! E manera e ta aktualmente, lamentablemente tin mas hende ta bai fayesé.