Tentamentu, atenshon na nos hóbennan spesial, material pa esnan na nivel di AGO tabata tópikonan ku nos a papia ku Germaine Jong Loy, dosente i preokupá ku e situashon na Kòrsou di nos hóbennan. Germaine ta mama di Khalil Guribaldi ku resientemente por sierto tambe a hañ’é den un situashon poko fèrfelu riba media sosial. Algu ku por a pone ku e hóbennan aki hala atras  sinembargo ku perseveransia i su mama su tras e ta sigui padilanti.

E resultado di tenta…

Tur kaminda tin tentamentu i tin algun kaminda spesífikamente por bishitá pa atendé kuné. E no ta haña tentamentu nada nèchi. E ta frustrante pa e víktima i hendenan ta tenta pasobra nan no sa mas mihó. Dia Germaine tabata chikí, kaminda el a lanta na Sürnam, e ta kòrda ku riba kaminda di skol el a topa hopi hende riba su kaminda, kada un na un manera diferente, un ta lastra slòf, otro ta kana bula. “Mi no tabata sa otro ora mi tabata chikí i mi tambe tabata hari”. Pero despues ora el a bira grandi i bira maestro i el a ripará ku esei tabata e resultado di e síndrome di Tourette. Einan el a kuminsá wak e kosnan diferente. Ora ta tenta hende riba retnan sosial, tur hende sa kiko e resultado por ta a largo plaso, hende asta ta yega na kometé suisidio. E ta algu masha duru.

Antes tabata tenta, hari i kla…

Antes nos tabata tenta, bo ta hari i pasa un minüt prèt pero awor el a bira Bullying. E ta for di hende su alkanse, for di nan poder komo víktima i esei ta pone un preshon enorme. Esaki segun Germaine no tin e lòs riba ret sosial den bo man mas. E ta bira públiko i ta keda pa semper i ta hasi doló. Hende mester tene kuenta ku e parti ei. Tur e víktimanan tin mama, famia i nan ta hende i tambe ta sinti meskos ku otro. I si tur djadumingu un hende ta sinta den misa i ta resa, djis pensa e palabranan promé ku bisa nan. Tuma e kurason di e palabranan, e esensia i sintié den bo kurason promé ku papia esakinan. I esei tin di hasi tambe ora ta aktua.

No e ret sosial, pero e hende ta e problema…

Germaine a yega di mira diferente erornan manera hende ku ta skibi papiamentu inkorektamente i asta esei ta bira tentamentu. E ret sosial no ta e kos mes, ta e hendenan tras di e ret sosial i ku ta yena e kos ku ta bira finalmente e Facebook, Twitter i Instagram ta loke nos tin di tene kuenta kuné.

 

Follow i like tambe ta konta…

Germaine no kier a papia di su kaso pasobra no ta e úniko kaso di tentamentu ku tin. Loke e ta kere ku for di momentu ku bo ta ‘follow’ i ‘like’ e tipo di tentamentunan ei, ta algu doloroso. Esei hende mester ta konsiente. Ta bai pa konsientisá ku ta e parti mas importante. E tambe a eksperensiá esei ora e tabata chikí pero for di momentu ku el a eduká i konsientisá ku por ehèmpel loke e señora tabata bula bula ora e tabata chikí ku ta Tourette Syndrome, el a bisa mas sabí i e sa ku den e pakus di Dios niun hende ta skohe, pero e ta haña. I e ke pa hende komprondé esaki. I bo ta hari i ‘like’ miéntras e no a toka bu.

 

Hinka positivismo den e mucha…

 Germaine a bisa ku bo no por sinta ku bo amiganan na mesa i bo yu ta sinta den huki ta hunga ku su ko’i hunga nan i ta ferwagt ku e yu aki no sa ku bo ta sinta hari un otro hende. Si bo ke pa bo yunan no krese den e parti ei, anto mihó stòp di hasié, publiká, loke, sinta hari òf hasié bo mes. Palabranan ta fuerte i esei nos a ripará for di basta tempu kaba i p’esei mes bo ta identifiká bo mes ku palabranan positivo. Mester hinka kos positivo den e yu su mente i den su aktuashon dor di bo aktuashon i bo opinion komo su mayor ku ta bisa ku esei no ta algu ku por aseptá. Ni pa propio yu.

Den pakus di Dios abo no ta skohe…

Pa loke ta e persona spesial, esun ku tin un defisiensia i ku tambe ta tené pafó di komunidat. No ta envolví nan i nan tambe ta bira víktimanan di tentamentu. Germaine a trata ku diferente mucha spesial den su karera komo maestro. I p’esei el a bolbe enfatisá aki ku den e pakus di Dios bo no ta skohe bo ta haña. Nos tur tin nos defektonan pero Dios a sòru pa drecha e kos ei masha nèchi mes. Mayoria bia sinembargo dor di e balki den nos wowo, ta mira e defisiensia serka e otro persona mas ku serka nos mes.

 

Mihó material pa AGO…

Pa loke ta enseñansa el a bisa ku esei ta hunga un ròl mas tantu. Germaine ta boga pa ta; Kòrsou ta bai haña un enseñansa nobo i pa e wak e situashon di e muchanan spesial tambe. E siman tras di lomba e ta kòrda ku minister a bisa di lo bai habri skol bèk pa e klasnan di eksámen. Esei pasobra muchanan tin derechi di enseñansa. I esei e ta haña hopi great, ounke e ta bisa en konekshon ku COVID ta un derechi pero mester wak ku tin un pandemia. I pa loke ta e enseñansa di muchanan spesial Germaine ta sinti falta di AGO ku ta wòrdu mas duná riba e nivel di e muchanan. Na e momentu e ta sinti falta di material pa e grupo di AGO, pa nan edat i riba e tereno di nan kas.  Ku esaki el a bisa ku mester wak e mucha su nivel i adaptá e materialnan na e sistema di Kòrsou. I esaki ta konta pa enseñansa general pa muchanan spesial. Mester hink’é asina bon den otro ku e ta kuadra ku loke mundu ta pidi. Por ehèmpel tin mucha den enseñansa spesial i nan no ta ni ábil den elektro, ni mètslá, ni hospitalidat pero kisas nan ta masha bon den kòmpiuter.

Pone e mucha spesial sentral…

Germaine ta hasi un apelashon riba e minister nobo ku ta bin, pa por fabor pone e derechi di e muchanan dilanti. Pone komo e obligashon ku nos tur tin komo komunidat pa ku e mucha ei. E muchanan aki tambe tin derechi di enseñansa. Enseñansa ta un ‘stief kindje’ i e kos ei ta duel Germaine i e ta rabia ora e mira riba murayanan di skol ku e mucha ta para sentral. E ke sa unda ta pone e mucha realmente bèrdat. For di momentu ku bo ta un tiki otro ta bisa ku e mucha no por ta einan i mester buska otro skol pa e mucha. I e grupo ei ta birando mas i mas grandi. I den kaso di e grupo aki ta haña muchanan ku ta bon bon pero komo nan a pega den e enseñansa ku tin aki, ku bukinan na hulandes, duna lès den papiamentu, duna prufwèrk den hulandes i eksámen na hulandes i esei ta kibra e pobersitunan. E muchanan kai no ta skucha hulandes tur dia i nan no a wòrdu lantá den un komunidat manera Hulanda ku ta papia hulandes pa nan kapta un tiki mas i pa nan por komprondé e bukinan. Esakinan ta pone e mucha faya, frustra, bira baldadi, haña mal komportashon. Germaine lo ke pa esei kambia i p’esei mester hasi un kambio. Mester bin material riba edat, ambiente, interes di nos yunan i no bin ku kosnan tradusí pasobra e no ta konta pa e muchanan aki. Tambe stòp di kòrta den enseñansa kada bes. No por papia di muchanan nos futuro i hendenan di mañan i kada bes ta bin ku promesa ku ni por bira realidat. “Mi ta spera mi ta papia ku mama i tatanan ku tambe ta den mesun problema i hañando enfrentá den e mundu di enseñansa ku no ta duna sufisiente yenamentu pa ku nan yu”.

LAGA UN KOMENTARIO

Please enter your comment!
Please enter your name here