Hopi huma pretu a bai laira den Dein

WILLEMSTAD.- Ayera den oranan di atardi polis i brantwer di Rio Canario huntu ku e otro unidatnan di Mundu Nobo i Steenrijk, mester a bai ku urgensia pa un kandela di shushi basta grandi ku a surgi den área di Kanga. Aparentemente ta trata di personanan ku a bai kima shushi na un lugá ku ta kolektá materialnan bieu. Pero esaki a sali fo’i man i a surgi un eksploshon ku a bira un kandela enorme ku tabata saka bastante huma.

E kandela aki tabata menasá otro kasnan den bisindario.

Mirando e situashon na e sitio, a pidi yudansa di katapila pa bin yuda bòltu e shushinan pa asina logra yega te abou.

Esaki pa motibu ku e kandela tabata hopi grandi i no tabata fásil pa por a pagá esaki.

Al final e bomberonan a logra dominá i paga e kandela i asina evitá ku esaki por sigui ekspand’é ku e konsekuensia ku e por hasi daño na e bibiendanan den bisindario.