WILLEMSTAD.- Gobièrnu di Kòrsou poko dia ei a bisa ku nan lo aktua mas severo kontra hendenan ku ilegalmente ta konstruí òf ta tuma tereno sin pèrmit bálido. Lo atendé tambe ku tiramentu di sushi ilegalmente, entre otro na Sint Joris (Dam Pretu), asina Ret Karibense ta skirbi.

Na e sitio e tiramentu ilegal di sushi ya ta un problema di basta tempu. Den e ministerio strukturando un tim ku ta bai okupá su mes ku e práktikanan ilegal aki. Huntu ku polis lo aktua severamente kontra infraktor, asina minister Cooper (Tráfiko, Transporte i Desaroyo Espasial) ta bisa.

Pa Ret Karibense Joëlle Jochems e temporada ku a pasa a bishitá e área i a papia ku vários habitante di West Groot Sint Joris tokante e problemanan rònt di e kimamentu di sushi ilegal.

Ku gobièrnu ke aktua mas severo segun esnan envolví ta zona bon, pero e abitantenan di Bándariba tin na dudanan.  Hendenan ku ta konfrontá ku e konsekuensianan di kimamentu di sushi ilegal ta papia di ‘molèster di holó stinki, huma i muskita’. Esaki ta un konsekuensia di kimamentu di sushi ilegal. I e problemanan ei ta eksistí pa basta tempu kaba.

Manera ta konosí e problema di kimamentu ilegal di sushi no ta nobo. Den aña 2015 abitantenan di Koraal Tabak a duna di konosé ku nan tabata fadá di e tiramentu i kimamentu di sushi ilegal den bario i a organisá un manifestashon dilanti di entrada di Sint Jorisbaai. E bario pa motibu di kimamentu di sushi tabatin hopi molèster di huma venenoso.

Lástimamente e anunsio di gobièrnu ku lo intervení mas fuerte tampoko no ta nobo. Esnan perhudiká ta spera ku minister Cooper (Tráfiko, Transporte i Desaroyo Espasial) ta kumpli ku su palabra i berdaderamente lo aktua kontra e problema. Pero tin duda ku esaki lo sosodé. Segun habitante di West Groot Sint Joris e kimamentu ilegal di sushi ta visibel klaramente i gobièrnu, si e ke, por intervení fásil kaba.

Un posibel solushon di e problema ta bini di un fuente inesperá: minister di Finansa: Javier Silvania.

Prosesadó di sushi Selikor algun tempu pasá a pidi un fiansa i Silvania ta dispuesto di duna esaki, asina a bira konosí kuminsamentu di aprel. Pero Silvania ta pone un kantidat di kondishon. Un di nan ta ku pueblo por tira sushi grátis un bia pa siman na e kaminda ofisial di tira sushi Malpais.

Mientrastantu ku hende mester paga pa tira sushi, lugá pa tira sushi ilegal ta keda interesante. Si por tira sushi grátis tambe podisé hende lo hasi esei, esei ta e pensamentu tras di esaki. E ora ei no tin motibu mas pa tira sushi ilegal. Selikor ta di akuerdo ku e kondishonnan ku Finansa ta pone, asina Silvana a bisa poko tempu ei.

E abitantenan di West Groot Sint Joris, pero otro hende tambe ku tin molèster di kimamentu di sushi ilegal, ta bisa ku nan ta spera ku e plan nobo tin konsekuensia positivo. “Kisas pòrnada, pero nos ta warda un kambio i nos ke pa gobièrnu tuma akshon”, segun un di e abitantenan di Dam Pretu.