WILLEMSTAD.-Informashon ku a yega mesa di redakshon di EXTRA ta indiká ku e kompania Klesch a ‘claim’ Refineria di Kòrsou (RdK). Manera ta konosí RdK a legumai e akuerdo ku Klesch despues ku no a logra konkretisá e plannan ku tabatin riba mesa pa Klesch tuma maneho i operashon di e Refineria Isla. Despues ku Klesch a resultá e “preferred bidder” den e proseso pa buska un operadó pa e refineria a firma diferente akuerdo. Klesch a manda vários grupo di profeshonal entre kua kompanianan di ingenieria, kompanianan di akountent i otronan. Meskos tambe a invertí den “due diligence” kua ta un investigashon kostoso, pa haña sa tur detaye di e posishon total di e refineria. RdK i gobièrnu di Kòrsou a hasi menshon na algun okashon ki fecha Klesch lo kuminsá manehá i operá e refineria, pero finalmente esaki no a kristalisá. Banda di esei tabatin algun manifestashon i akshon di protesta den komunidat kontra binimentu di Klesch. RdK a legumai Klesch i a kuminsá un proseso nobo pa buska operadó nobo pa e refineria. Informashon ku EXTRA ta dispone di dje ta indiká ku representantenan di Klesch a warda te momentu ku tin partidonan realmente interesá pa manehá i operá e refineria pa awor presentá nan claim kontra Refineria di Kòrsou.

Premier Rhuggenaath ta spera ku lo por yega na un solushon amikal ku Klesch, asina el a deklará na EXTRA.

Direktor interino di RdK Marcelino de Lannoy den deklarashon na EXTRA indiká ku e ‘claim’ di Klesch ta pa e kompania haña un deklarashon di korte den kua ta indiká ku Klesch por kobra RdK pa tur e gastunan ku nan a hasi den preparashon di e proyekto aki. Chonky de Lannoy a splika ku Kòrsou tambe tin mesun ‘claim’ kontra di Klesch. Na opinion di e direktor di RdK, si ámbos partido haña loke ku nan a pidi, anto e veredikto lo ta hopi na benefisio di RdK(lesa Kòrsou).