WILLEMSTAD.- Un di e tantísimo klientenan kansa di e trato di Aqualectra a bati na porta di EXTRA pa asina wak ku kisas via di e medio aki e lo por haña oido.

E kliente ku ta abitante di e área di Sta. Rosa a indiká ku ya pa basta tempu un kantidat grandi di kliente di Aqualectra ta reklamá kuantu biaha koriente ta keda bai. Pero e abitante a indiká na EXTRA ku den su kaso ta algu masha pekuliar ta tuma lugá.

For di dia 3 yanüari último tur dia koriente ta bai sin falta niun dia. E último dianan ku koriente no a bai tabata durante siman di tumba. Pero e siman aki tur kos a sigui meskos. E pèrdèmentu di koriente ta tuma lugá ‘vast’ den e mesun orario di 12or di mardugá pa 2 or di mainta i tambe mainta di 10or pa 12or. Mas aleu e kliente a indiká na EXTRA ku na e kas en kuestion ta biba personanan di edat den rolstul kual ta pasa hopi mal ratu ora koriente ta bai.

Na momentu ku e kliente bèl informá kiko ta pasando, e ta haña pa kontesta ku ta mantenshon tin i ku a publiká esaki, lokual no ta e kaso paso nada a sali den por ehèmpel korant. Otro biaha e kliente ta keda sin un splikashon di lokual ta pasando. E kliente aki ta unu ku tin hopi eksperensia amargo ku Aqualectra.

Den pasando tabatin momentunan ku praktikamente tur aparato elektróniko den kas a daña despues ku koriente a bai i sin ku te awe e kliente haña kompensashon pa e daño kousa.

Ta spera ku Aqualectra tuma djis un tiki tempu i seriedat pa atendé ku henter e situashon aki i prinsipalmente e manera ku ta trata ku kliente.