WILLEMSTAD – Den transkurso di e aña aki Kooyman i Funmiles a inisiá un programa di donashon di Funmiles pa e ‘Daily Meal Program’. Klientenan di Kooyman por a hasi donashon di nan Funmiles i ayera e programa aki a bin kulminá den un donashon di 30 mil florin na ‘Daily Meal Program’.

For di e prinsipio di e krísis di Corona e ‘Daily Mael Program’ a yuda esnan mas vulnerabel di nos komunidat pa duna nan un kuminda saludabel i nutrisioso diariamente.

E donashon di ayera lo keda usa pa fase 2 di e programa di kuminda diario aki; Kushina den bario. Ademas pa sostené e fase 3 ku ta plantashon di nan propio berdura i fruta.

“Nos ta di opinion ku bou di e sirkunstansianan di krísis aktual, ta sumamente importante pa pone énfasis riba inisiativanan ku ta yuda esnan ku ta den situashon difísil,” asina Juri Kooyman a bisa ayera. “Den 5 luna nan tras di lomba nos klientenan di Kooyman na momentu di pago por a hasi donashon di nan Funmiles na  Daily Meal Program. Nos ta hopi orguyoso ku e gran sentido di preokupashon pa yuda nan próhimo nan.”

Antoinette Akerboom, sekretario di ‘Daily Meal Program’  a ekspresá su gratitut pa e donashon aki i ta sumamente kontentu ku e inisiativa aki i ta spera ku otro organisashonnan tuma ehèmpel di esaki paso lamentablemente nos no a surpasá e tempu nan difísil ainda i nos por hasi uso di mas yudansa.”

E programa di donashon di Funmiles na Kooyman a kaba awor pero si a kaso ke hasi un donashon ainda por hasi esaki via di https://www.dailymealprogram.com/doneer/.