WILLEMSTAD.- Durante dos dia di kontròl dia djamars 11 mei i djárason 12 di mei, klientenan ku tabata na un restorant no a keda masha kontentu ku polis a atendé ku nan, i nan a lanta kontra di outoridatnan. E polisnan ta forma parti dje Tim Multidisiplinario ku tur dia ta hasi kontròlnan relashoná ku medidanan di COVID-19.
Un resúmen ta indiká ku pa ámbos dia e tim a kontrolá un total di 31 establesimentu di kual 12 tur kos tabata na òrdu, 11 a haña un aviso, a parti 7 but i tambe a sera dos establesimentu.
Riba djamars 11 di mei, a duna aviso na un restorant riba Gosieweg pa yenamentu di bòter ku alkohòl; establesimentu riba Schottegatweg West a haña aviso pasombra e pèrmit ekonómiko ku e establesimentu aki tin no ta permití pa bende bebida alkohóliko.
Na un restorant riba FD Rooseveltweg, a duna un aviso pa permití kliente sinta i konsumí na e sitio. Tabata na e lokalidat aki, a surgi un interkambio di palabra entre polis i kliente, despues ku sierto kliente a resistí instrukshon di polis ku no por sinta konsumí na e sitio.
Aviso pa permití kliente sinta i konsumí na e sitio a kai pa bar/restorant riba FD Rooseveltweg, bar/restorant riba Schottegatweg West, i bar/restorant Schottegatweg West.
But pa tapaboka a kai na e siguiente establesimentunan: un toko riba Sto. Domingoweg, panaderia na Blanquillaweg, snek den Bermudaweg, snek na Mirla Plateweg (aki 2 but a keda otorgá pa tapaboka), otro establesimentu riba FD Rooseveltweg.
Bar na Puerto Ricoweg a keda sera pasombra ainda no ta permití pa barnan habri.
Un establesimentu riba Schottegatweg, despues ku anteriormente a instruí e propietario pa no sirbi kliente na e sitio, a konstatá ku no a duna oido na e instrukshon, a sera e establesimentu.
Kontrol djárason 12 mei 2021:
Aviso pa permití kliente konsumí na e sitio a kai p’e siguiente establesimentunan na Moontjeweg, un terasa riba Barbuquet, restorant riba Cadushistraat, i toko riba Juan Hatoweg. Na e último aki kliente tabata kumpra na bentana i para bebe na e sitio.
Un cafe riba Anjeliersweg a haña un aviso, pa un terasa improvisá ku nan a pone, i asina permití kliente sinta konsumí.
Finalmente a duna un restorant na Hoenderberg un but pa orario di sera.