WILLEMSTAD.- Ora 0 ta yegando pa Girobank. Klientenan ku tin sèn na e banko ta haña di tende ku nan no por lanta sèn for di nan kuenta di spar. Esaki ta kousando un pániko enorme bou di klientenan.

Segun EXTRA por e komprondé Banko sentral di Kòrsou i St. Maarten a pone e banko bou di un moratorio, loke a kousa e situashon aki. Informashon ku EXTRA ta disponé di dje mas aleu ta indiká ku bankonan koresponsal for di Merka ta kitando nan man for di Girobank, esta retirá for di nan akuerdonan di koperashon.

Trahadónan di e banko ta teniendo kuenta ku awor si e banko lo no ta logra sobrebibí i ku nan trabou ta na peliger. Pregunta kiko Banko Sentral ta bai hasi despues di tin Girobank 6 aña kaba bou di areglo di emergensia.

No a logra solushoná e problemanan di Girobank, no a logra bende e banko i awor e medida di moratorio no ta mustra di ta e solushon tampoko. Presidente di CBCS saliente, Bob Traa a presentá un solushon pa Girobank inkluso ayudo di ekspertonan di Hilanda kon pa atendé ku bankonan ku ta den peliger di “val om”.

El a partisipá esaki tambe na Konseho di Minister, pero a tuma Traa na malu ku el a bin konta un “verhaaltje” manera EXTRA ya a yega di informá. A papia malu ku Traa i asta menas’é. Algu ku nunka el a yega di eksperensia den su añanan trahando den e funshonnan di mas haltu den mundu finansiero.