‘Mester tin mihó komunikashon entre CMC i SVB’
WILLEMSTAD.- Mester tin mihó komunikashon entre hòspital CMC i Banko di Seguro Sosial, SVB. “Sino kosnan ta bai robes ku konsekuensia ku hende por muri”, parlamentario pa partido Nashonal, Elvin Gerard ta bisa.
E parlamentario i su famia ta furioso pa loke a pasa kuné despues di a yega Bogotá, Colombia pa risibí tratamentu médiko. Gerard den deklarashon pa EXTRA ta splika ku a manda dokumento médiko robes pa dòkternan na Colombia.
“Si mi mes no tabata bon na tinu kiko tabata pasando Dios sa kiko lo a para di mi”, Gerard ta opiná. Via SVB a manda e parlamentario Colombia pa un doló di lomba ku e tin algun luna kaba ta kana kuné, pero e dokumentonan médiko ku a bai Colombia tabata indiká un otro kondishon médiko di pasado, esta bludumentu i diarea.
“Tur hende wanta nan kurpa pasobra ora mi ta bèk niun hende ta skapa. Tur ku a faya mi ta tene responsabel pa loke a pasa. Nan no ta skapa. Ta asin’aki ta mata yu di Kòrsou”, Gerard ta sigui bisa.
Gerard a biaha siman pasá djaluna pa Bogotá. Djamars el a bai e klínika i a hasi un kantidat di tèst. Djárason anochi e ta risibí yamada di e klínika pa e akudí mesora einan pasobra nan ke pa e ta interná.
El a sali hotèl i bai e klínika pa anochi mas lat e internista a pasa serka dje i bis’é ku den e tèstnan ku el a hasi nan no ta mira e problemanan ku tin poné den e dokumentonan médiko ku a bini for di Kòrsou. “Mi a puntra e dòkter ta kiko tin den e dokumentonan i a resultá ku ta informashon bieu i ku no tin nada di aber ku e motibu dikon mi a bai Colombia.”
Gerard ta sigui bisa ku el splika e internista ta pa kiko el a bin Colombia i na unda e tin doló. “E internista a sinta nota tur lokual mi a bis’é. Nan a tene mi den e klínika, pone mi na infüs ku remedi kontra e doló.”
Gerard ta bisa ku e mesun djárason anochi el a yama direktor di SVB, pero no a logra hañ’é na telefòn. Despues el a manda un “voicenote” pe i tambe pa e departamento ku a regla su “uitzending” splikando kiko ta pasando.
A dura te djasabra mainta pa e dokumentonan médiko korekto a yega Colombia. “Mi a hasi un sèt di tèst nobo djasabra i mi ta wardando riba e resultadonan.”
Gerard ta sumamente indigná pa lokual a pasa i e ta bisa ku famianan ku a bai Colombia kuné i esnan na Kòrsou ta furioso. E ta mustra ku ta di 7’or di mainta pa 7’or di anochi e por risibí bishita na e klínika i ora dòkter a bin papia kuné tabata mas lat, pues e so tabata den kamber.
“Imaginá bo ku tabata trata di un hende ku no ta komprondé bon kiko e dòkter a papia kuné òf ku a yega Colombia fuera di su konosementu. Ta kiko lo a pasa ku e persona aki.”
Mas aleu e parlamentario ta di opinion ku mester tin mihó kontròl den e komunikashon entre CMC i SVB. “Dòkternan di SVB tambe tin ku kontrolá e informashon ku ta risibí riba malesa di e pashènt ku ta manda afó. Asta mester laga esnan ku ta bai afó ku e pashènt kontrolá si tur kos ta na òrdu .”
Finalmente Gerard ta bisa ku el a pèrdè 5 dia debí na e fayo ku a kometé den su informashon médiko. “Mi ta tene mi mes trankil i mi a hasi un apelashon riba mi famianan pa nan tambe keda kalmu. Mi ta spera ku tur kos bai bon i pa mi por rekuperá pronto, pero ora mi ta bèk na Kòrsou mi ta bai eksigí pa saka afó ta unda e fayo ta sintá. Niun hende no ta kaba ku mi di e forma aki, pero ora mi ta bèk nos ta bai wak ta ken ta kaba ku ken.”
Foto:
…Elvin Gerard…
