Gobièrnu ta disidí si ta subi kantidat máksimo pa kumpli ku demanda

WILLEMSTAD.-For di momentu ku premier ulandes Mark Rutte a anunsiá ku no tin restrikshon pa biaha pa e islanan di Karibe Ulandes por a nota un kresementu enorme di demanda e.o pa Kòrsou. Sinembargo relashoná ku protekshon di e poblashon lokal kontra Corona vírus gobièrnu di Kòrsou a pone un limitashon di turista ku ta permití for di Ulanda. Esaki tabata na 10 mil, pero entretantu a oumentá e kantidat máksimo na 20 mil turista pa e lunanan oktober i novèmber. Den kombersashon ku Cees Ursem di KLM el a duna di konosé na EXTRA ku KLM a adaptá su skema pa desèmber, teniendo kuenta ku e sifra máksimo di 20 mil turista.

Fin di aña semper ta un kustumber ku studiantenan di Kòrsou ta hasi lo máksimo pa konvensé mayornan pa bin pasa dianan di fiesta i kambio di aña na kas, apesar di preis haltu den e temporada ei. Ya kaba tin esnan ku a ripara ku ta difísil pa haña vuelo pa bini Kòrsou e fin di aña aki, awor ku Ulanda ta mira Kòrsou komo un destinashon plasentero i praktikamente liber di Covid-19. Tin mayor ku a ekspresá preokupashon pa e preisnan ku lo drenta na vigor una bes Ulanda kompletu kuminsá pensa riba Kòrsou komo destinashon.

Ursem di KLM a enfatisá ku nan ta tene kuenta ku e regla imponé pa gobièrnu ku no por surpasá 20 mil turista pa luna. Te ku aña pasá KLM tabata realisá 2x vuelo pa dia, tur dia. Awendia ta algun dia so tin dos vuelo pa dia, ademas teniendo kuenta ku Corona e kapasidat ta ménos. KLM tambe a tuma nota ku for di despues di e deklarashon di premier Rutte ku tin hopi mas atenshon pa e islanan di Karibe ulandes.

Segun Ursem, mester wak si gobièrnu di Kòrsou ta dispuesto pa subi e kantidat máksimo di turista ku ta permití.  Den kaso ku oumentá e kantidat máksimo di turista ku ta permití for di Ulanda KLM lo por pensa pa adaptá su kapasidat. Naturalmente ta dependé kon grandi  demanda, pero tur kos ta dependé di desishon di outoridatnan lokal.

Riba e pregunta si KLM mes lo aktua proaktivo i pidi pa subi e kantidat máksimo di turista Ursem a bisa ku esei lo por ta un posibilidat, pero ta gobièrnu di  Kòrsou ta disidí.