A’DAM/W’STAD.- For di Hulanda nos a risibí informashon ku KLM lo ta bai suavisá e proseso di biahe pa su pasaheronan. Pa vuelo i destinashonnan direkto manera Kòrsou i St. Maarten, pasaheronan lo por chèk ‘online’ si nan ta den poder di e dokumentonan apropiá pa COVID-19. E kontròl ‘online’ di dokumentonan pa COVID-19 ta disponibel pa vuelonan di KLM riba sinku destinashon, kualnan ta: Kòrsou, Dubai, Lima, St. Maarten i Istanbul. Ta spera ku den futuro e kantidat ei lo ser ampliá.

Klientenan ku a reservá un vuelo pa un dje destinashonnan menshoná ta risibí un invitashon pa partisipá. Nan lo por ‘upload’ e dokumentonan rekerí te ku sinku ora promé ku e vuelo Sali. Un tim di KLM lo chèk si tur kos ta na òrdu i seguidamente lo manda un konfirmashon denter di un ora.

Biahamentu ne momentunan aki ta algu kompliká, pa motibu ku kada pais ta stipulá su kondishonnan pa entrada, ku por sierto lo por kambia hopi lihé. Pero pa KLM ta importante pa su klientenan tin ménos preokupashon posibel. P’esei mes a pensa riba KLM su chekeo ‘Upload@Home’. Pero e servisio inovativo aki ta pone ku klientenan di KLM por bai aeropuerto ku un sintimentu trankil, pasobra nan tin sigur ku nan tin nan dokumentonan na òrdu. Esei di akuerdo ku Boet Kreiken, Vise Presidente Ehekutivo di ‘Customer Experience’ na KLM a duna di konosé.

Na aeropuerto:

Tur pasahero ku tin mester di dokumentonan relashoná ku COVID-19 pa nan biahe, lo por buska nan tarheta di abordá i chèk nan ekipahe na aeropuerto. Si nan a laga chèk nan dokumentonan adelantá via ‘online’ (Upload@Home), solamente lo tin di mustra nan pasport òf karchi di identifikashon i eventualmente nan visa.