WILLEMSTAD.- E “Confederación Latinoamericana y del Caribe de Trabajadores Estatales” (CLATE) a klousurá su konferensia na Kòrsou djabièrnè anochi ku un nochi kultural inolvidabel. CLATE ta un organisashon sindikal internashonal ku ta uni trahadónan di sektor públiko di paisnan di Latinoamérika. E ta dediká na establesé i implementá polítika global i kordiná pa promové e derecho i interesnan di trahadónan di sektor públiko, stimulando un spiritu di humanismo i solidaridat.

E anochi a kuminsá ku palabra di bon biní di presidentenan di diferente sindikatonan di Kòrsou, siguí pa diskursonan di Julio Fuentes, presidente di CLATE, i Minister di Maneho di Gobernashon, Planifikashon i Servisio Públiko (BPD), Ornelio ‘Kid’ Martina. E diskursonan a enfatisá importansia di kolaborashon pa derecho di funshonarionan públiko i interkambio kultural den e region.

E puntonan di salida tabata ku solamente si enfoká riba diálogo i union por logra benefisio sosial i un pago adekuá. A afirmá importansia di e mishon konhunto i nesesidat pa sigui traha pa derecho di trahadónan."

E anochi a kulminá ku un presentashon impreshonante di Kreadanza. E grupo aki a logra koutivá e huéspetnan ku un presentashon ku ta mustra e rikesa di kultura di Kòrsou, ku un enfoke spesial riba bailenan tradishonal manera wals, seú, mazurka i a sera ku un mini karnaval pa asina duna e bishitantenan un toke di nos karnaval i tumba.

Despues di tres dia di seshon intensivo i diskushonnan produktivo e nochi kultural a duna e partisipantenan un oportunidat úniko pa eksperensia e diversidat di nos kultura i naturalmente siña kon nos ta baila. Tabata pa promé biaha, mas ku 80 partisipante for di 16 di e 19 paisnan afiliá a bin huntu pa tuma parti den e reunion importante aki, a keda sera e konferensia ku un nochi yen di kultura i unidat.

E organisashon ta mira bèk riba un enkuentro hopi eksitoso ku retonan i mishonnan pa logra huntu pa futuro. Esaki no ta konta solamente pa kontenido di e konferensia, pero tambe pa e trato risibí. E tim di e presidensia di CLATE a felisitá Kòrsou ku un organisashon perfekto di un gran evento i ta di opinion ku a hiba debate i yega na proposishonnan riba tereno di trabou pa enfrentá e retonan di e tempunan ku ta aden.

E delegashon di Brasil a yama Kòrsou un pèrla den Karibe i a yama danki pa e atenshon risibí i tambe pa un organisashon magnífiko di e konferensia. E delegashon di CONATE CASC, e konfederashon nashonal di trahadónan di estado di Repúblika Dominikana tambe a felisitá Kòrsou pa e organisashon di e konferensia i pa a laga miembronan di e delegashon a sinti nan mes na kas.

E delegashon di ULTRADEC, Colombia a yama danki pa un trato ekselente i un konferensia ku tabata eksitoso kaminda a hiba diskushon riba puntonan relevante yamando danki na e kuater sindikatonan di Kòrsou ku a yuda organisá e konferensia.

Asina mas felisitashon i palabranan di gratitut a drenta for di demas delegashon i organisashonnan di Ecuador, Costa Rica, México, Paraguay i Argentina a drenta. Tur rekonosiendo ku e konferensia tabata bon organisá ku e debatenan tabata na nivel, e tópikonan ku a trata tabata al kaso i e trato risibí tremendo.