Prensa por fabor no saka potrèt di esnan ku ta bai test

WILLEMSTAD.- Dr. Izzy Gerstenbluth den su splikashon na komunidat a informá ku a bini 4 hende mas pa yega na 53 kaso total for di mart. Di e 53 kasonan 18 ta aktivo. Mas aleu sr. Gerstenbuth a duna di konosé ku e 4 kasonan nobo ta transmishon lokal i konektá ku un di e klusternan anterior. GMN no ta identifiká e personanan ku a test positivo i ta pidi tur hende pa nos hasi esei. Meskos ta pidi e personanan pa tene kuenta kiko ta divulgá riba Facebook etc.

El a splika tambe ku e motibu pa kiko ta enfatisá ku ta trata di un kaso ku ta di un kluster òf no ta importante pasobra esei ta duna indikashon kon bon òf kon malu ta logrando atendé Covid na Kòrsou. Pues ora bisa ku ta trata di un kaso ku ta di lenk na otro kluster ta nifiká ku den ‘contact tracing’ a logra haña e hende. Den kaso ku no por lenk e kaso ta nifiká ku e vírus ta plamando ketu bai.

Ayera a start ku ‘drive thru testing’ loke a resultá un éksito. A logra test un kantidat di hende ku den kaso normal ku e timnan lo mester a kore rònt Kòrsou nan lo no por a logra hasi asina tantu. E strategia tabata pa asina tin sospecho  di un kaso pa mantené e hende na kas i un tim lo bai serka dje, pa asina evitá ku ta plama e vírus, pero awor ku tin mas kaso mester hasié mas efisiente.

Gerstenbluth a hasi un petishon i apelashon serio na tur hende i speshalmente na prensa pa no saka potrèt ni hasi grabashon di hendenan ku ta bai test. El a pidi pa respetá privasidat di hendenan i no saka nan potrèt. Direktorado di komunikashon mes lo perkurá pa foto i filmashon pa tur prensa. Mas detaye den edishon di EXTRA.