Parlamento Kòrsou a aprobá biahe delegashon pa asistí na e reunion aki

DEN HAAG.- Den un karta ku sekretario di estado Raymond Knops a kaba di manda pa presidente di Eerste Kamer, e ta pidi pa wanta ku e reunion plenario ku mester tuma lugá den kua mester trata ‘rijkswet Koninkrijksgeschillen’.

Ta trata di un karta fechá 28 di mei ku a bai awor ei pa Eerste Kamer. Parlamento di Kòrsou a kaba di trata e proposishon pa un delegashon bai Ulanda pa asistí na e reunion menshoná, pero Knops a pidi pa wanta ku e reunion ei.

Den su karta e sekretario di estado Knops ta mustra ku e reunion ta plania pa 1 yüni 2021 den un seshon plenario. Knops ta indiká ku a resultá ku no tin sosten pa e proposishon ku ta riba mesa serka e Parlamento di Kòrsou, Aruba ni Sint Maarten. Tumando esakinan na konsiderashon e sekretario di estado, tambe na nòmber di minister presidènt i minister di Asuntunan General ta pidi pa wanta ku e tratamentu di e proposishon riba mesa i asina duna espasio na Konseho di minister di Reino pa deliberá riba e situashon ku a presentá.