Ulanda ta pone 12 mion euro pa aña pa Karibe Ulandes

WILLEMSTAD.-Sekretario di estado Raymond Knops ta masha orguyoso di e trabounan ku e ‘Team Bestrijding Ondermijning’(TBO) ta logrando den Karibe Ulandes. Nan ta logrando ku hopi éksito pa pone lus skèrpi riba kasonan di korupshon, froude ku belasting, labamentu di plaka i falsifikashon, ekstorshon i otro krímennan kometé pa personanan ligá na polítika i empresanan privá. A inisiá persekushon i kondena a kai den kasonan. Ku e esfuerso èkstra aki a haña mihó bista riba kasonan di korupshon i labamentu di plaka den Karibe Ulandes. Esei Knops ta skibi den un karta na Tweede Kamer.

Knops ta splika Parlamento ulandes ku mester di rosea largu den e lucha kontra krímen organisá riba e islanan aki. Na 2016 a instituí e TBO den forma di un proyekto pa atendé ku krímen organisá den e aparato públiko. E sekretario di estado a informá Tweede Kamer ku tur aña gobièrnu ulandes ta pone 12 mion euro disponibel pa esaki.

E yudansa ulandes ta bai pa RST, OM i tambe korte. Na 2019 e parlamentarionan Bosman (VVD) i tambe van Raak (SP) a presentá un moshon den kua a pidi pa kontinuashon di e yudansa di Ulanda na e islanan pa kombatí kriminalidat. Mas detaye den edishon di EXTRA.