WILLEMSTAD.- No ta awor komunidat konosé e situashon ku tin den tráfiko. Tin hopi kos for di regla ta tuma lugá i ta ku asombro mester mira kon e ta empeorando. Shofùrnan den tráfiko ta pasa den lus kòrá, no ta bisti faha di seguridat, ta papia na telefòn, ta app riba telefòn, i tur esakinan ta sirkunstansianan ku ta peligrando nos tráfiko. Esei di akuerdo ku parlamentario sr. Ramon Yung den komishon sentral riba e tópiko di seguridat den tráfiko.

Na su konsepto, teniendo kuenta kon e situashon ta aktualmente e ta riska na bisa ku esaki a sali fo’i man. Ta pa hopi aña e situashon aki ta eksistí i ta empeorando, i e tin di bisa ku gobièrnunan di turno no a bin ta hasi muchu kos tampoko.

Mas aleu sr. Yung a referí na un rapòrt di Raad voor de Rechtshandhaving ku lo ta mustra riba puntonan ku hopi hende ta preokupá kuné. E parlamentario a konsiderá e shofùrnan iresponsabel komo pirata. Hopi bes ta hendenan ku no ta manehá un vehíkulo riba kareteranan públiko sin ku nan tin ningun dokumento legal. I den esaki por menshoná e.o. vehíkulonan sin papel di kùr, sin number pagá, sin seguro. I ta e piratanan aki ta bai tira pará riba kamindanan públiko, hinka otro hende den problema sin ku nan por para responsabel pa nan aktonan.

Pero mirando ku e sistema ta di tal manera hinká den otro ku un doño di vehíkulo tin di hasi diferente trámite pa su outo ta legalmente riba kaminda. Den su parti di pregunta sr. Yung a sugirí pa kobra hendenan ku tin but habrí promé ku nan por risibí steker dje siguiente periodo den aña di belasting. Si un shofùr tin butnan habrí pasobra el a kometé un òf mas infrakshon kaba den tráfiko i ku e ta representá un peliger, anto gobièrnu lo mester por kambia lei di tal forma ku ta obligá e persona ei di kumpli i asina pone preshon riba dje pa e realisá ku e tin di bai mas responsabel den tráfiko.

Dor ku bo no ta haña bo plachi di number òf steker, polis por tin mihó kontròl riba e tipo di vehíkulonan aki.

Segun Yung, e ta kere ku mester tin mihó kordinashon i pa e diferente servisionan ta mas mihó akoplá ku otro. Esaki por fasilitá e trabou di polis, i esaki por mira si un vehíkulo tin su papelnan na òrdu. Tambe mester por kontrolá si e shofùr tin but habrí.

Kantidat di but:

Di akuerdo ku e rapòrt riba menshoná, di 2014 pa 2017 a repartí un total di 21.328 but; di 2010 te ku 2016 tabatin 84.652 aksidente, di kual 2.595 tabata aksidentenan ku hende leshoná, aunke e kresementu tabata notabel entre 2013 i 2016.