WILLEMSTAD.- ‘Nos tur ta eksperensiando den e pandemia di Corona ku tin hopi hende ku ta den situashon fèrfelu. Tambe mi por bisa ku nos ámtenarnan ta trahando bou di bastante stress i hopi preshon pa por logra pa yuda hende ku ta den nesesidat. Pero mi ta eksperensiá hopi bia ku vários di e ámtenarnan ta wòrdu kritiká inhustamente i tin asta menasá ku palabranan ménos bunita.’ Asina minister di Desaroyo Sosial, Labor i Bienestar (SOAW) Hensley Koeiman a bisa djaweps último durante konferensia di prensa di gobièrnu.
Koeiman a pidi, ‘na e tiki hendenan ku ta hasi esaki’, pa trata su ámtenarnan ku rèspèt. Segun minister di SOAW un gran mayoria di hende ta konsiente di e trabou ku e ámtenarnan ta hasi, hopi bia te oranan lat.
‘Pero tin hende ku ta kere ku nan mag di bisa kiko ku nan ke. Pero komo minister mi tin ku sali representá i defendé mi ámtenarnan.’ Koeiman a splika: ‘Si nan ta hasi un fayo mes, nos ta atendé paden. Pero hamas i nunka bo por pensa ku bo por menasá trahadónan ku simplemente ta hasi nan trabou.’ Koeiman a enfatisá ku ámtenarnan tin ku kumpli ku kriterio stipulá dor di gobièrnu. Ministerio di SOAW ta wòrdu kontrolá dor di SOAB i Kontraloria general. ‘Tambe tin parlamento ku por hasi tur sorto di pregunta. Pa e motibu ei mes, mi ta kere ku ta bon ku nos sa ku nos ta trata hende semper ku e desensia nesesario. Ounke nos ta komprendé ku tin bia ku hende ta bou di sierto preshon.’
Manera ta konosí, na kuminsamentu di luna di mei gobièrnunan di Kòrsou i Hulanda a yega na un akuerdo riba transishon di e programa di ayudo di alimentashon di Krus Kòrá pa e ministerio di SOAW. A firma un protokòl ku ta regulá e manera ku e transishon aki lo tuma lugá. E programa di ayudo di Krus Kòrá ta konsistí di kuminda kayente, pakete di kuminda i karchi di komestibel.
Koeiman a splika djaweps último ku despues ministerio di SOAW a firma e protokòl ku Hulanda ‘por nota kaba ku tin vários hende ku no a mèldu ainda, pasobra nan ta konsiente ku nan no tabatin derechi pa loke Krus Kòrá a duna. Tin vários hende ku si a registrá i tambe ku nos a nota ku tabata haña ayudo sin nan tabatin derechi riba esei. I esei ora ta kousa frustrashon. Pasobra si direpente kita algu for di bo - mas ku bo no tin derechi riba dje - tin hende ku ta haña ku esei no por. Nan por bira rabiá òf frustrá. Pero nos mester tin regla i tur kos mester ta hustu.’