WILLEMSTAD.- A surgi un “kiebro” mahos entre e fundadónan di partido Trabou pa Kòrsou enkabesá pa Rennox Calmes. Den wikènt e notisia dje kiebro a surgi, por bisa un siman despues di elekshon di dia 19 di mart último.
Calmes ku ta kofundadó dje partido a indiká ku el a kibra tur laso ku e otro kofundadó sra. Ayshel Maria. Calmes a bisa di ta keda ku e nòmber dje partido, pero di otro banda sra. Maria ta bisa ku nòmber di e partido ta registrá na Bureau Intellectuele Eigendom Curaçao i pues Calmes lo no por sigui usa nòmber dje partido.
Segun nos por a komprondé for di fuentenan yegá na sra. Maria ku nan no a manda karta ainda pa sr. Calmes pa pidié pa distansiá for di e partido. Ta e direktiva ku tin sosten di e kofundadó aki (Maria) lo mester hasi esei. Sinembargo nan lo ke sinta papia ku sr. Calmes pa kaba e kosnan nèchi, pasobra e situashon aki lo no ta kontribuí na un bon desaroyo dje partido.
Alabes nos a komprondé ku sra. Maria no sa ta kon Calmes por bisa ku el a kore kuné, siendo ku e partido ta di dje tambe. E no a haña ningun karta di Calmes aparentemente.
E partido no a keda lantá solamente pa sra. Maria, pero tambe dor di su subrino ku ta kandidato number 6 riba e lista dje partido, Atley Maria ku e meta pa yuda hóbennan desaroyá den mundu polítiko i yuda hóbennan en general.
En bèrdat promé ku pre-elekshon no a lanta e partido na notario, pero despues ku kosnan a kambia, famia Maria lo a bai notario kaminda lo a funda e partido Trabou pa Kòrsou i meskos tambe a patentá e nòmber na Bureau Intellectuele Eigendom Curaçao. Pues e nòmber lo ta di e direktiva ku signatura Maria i no Calmes.
Pues ta di mira kon e “guera’ pa partido entre Calmes i Maria(nan) tei terminá, si ta korte te kaminda pa kana pa haña klaridat.